Almatynyń taý klasterin damytý: 1000 km astam taý baǵyttary tsıfrlandyryldy
Qala ákimi B. Saǵyntaev Instagram paraqshasynda Almaty taýlarynda týrısterdiń qaýipsizdigin qamtamasyz etý úshin baqylaý-qutqarý pýnktteriniń ashylatynyn jáne taý soqpaqtaryn abattandyrý jumystarynyń jalǵasatynyn jetkizdi.
«Óziniń tańǵajaıyp tabıǵatymen máshhúr Іle Alataýynyń taýlary almatylyqtar men qala qonaqtary úshin kórikti ári tartymdy mekenniń biri. Osy oraıda taýda qaýipsizdik sharalaryn saqtaǵan jón. Biz óz kezegimizde osyndaı joryqtardyń qaýipsizdigin qamtamasyz etý úshin ınfraqurylymdy jaqsartý boıynsha jumystardy qolǵa aldyq», - dedi B. Saǵyntaev.
Onyń aıtýynsha, Almatynyń taý klasterin damytý aıasynda myń shaqyrymnan astam taý baǵyttary tsıfrlandyryldy. Onyń ishinde jalpy uzyndyǵy 500 shaqyrym bolatyn 36 baǵyt abattandyryldy.
«Qazirdiń ózinde myń shaqyrymnan astam taý marshrýttaryn tsıfrladyq, onyń jalpy uzyndyǵy 500 km bolatyn 36-sy abattandyryldy. Marshrýttardyń shemasy, onyń kúrdeliligi kórsetilgen aqparattyq stendter ornatyldy. 2021 jyly 120 shaqyrymǵa jetetin taý joly abattandyrylmaq. Kishi jáne Úlken Almaty shatqalynda eki baqylaý-qutqarý pýnktiniń qurylysy qarastyrylǵan. 16 taý qutqarýshysy táýlik boıy kezekshilik etedi», - dep jazdy B. Saǵyntaev.
Almaty ákimi shalǵaı ornalasqan 14 toraptyq ýchaskelerde týrısterdiń kúrdeli aýa raıy jaǵdaılaryn kúte alatyn arnaıy qorǵaný oryndarynyń uıymdastyrylatynyn aıtty.
«Shalǵaıda ornalasqan 14 toraptyq ýchaskede kúrdeli aýa raıy jaǵdaılaryn kútýge bolatyn jasyryný oryndaryn uıymdastyramyz. «Tuıyq sý» shatqalynda tikushaq alańyn qurý josparda bar. Túrli núktelerde dabyl túımeleri bar 10 radıorelelik dińgekterdi ornatý jáne «Tau Go» smart-navıgator qosymshasyn ázirleý kózdelgen», - dedi B. Saǵyntaev.
«Shymbulaq» taý kýrorty vızıt-ortalyqtarynyń bazasyndaǵy jáne «Medeýdiń» bazalyq stansasyndaǵy taý betkeılerinde saqtyq erejelerin kúsheıtý úshin taýǵa shyǵar aldyndaturaqty túrde nusqaýlyqtar ótkiziledi, kásibı gıdtarmen ekskýrsııa júrgiziledi.
Aıta ketý kerek, búgin Mánshúk Mámetova shyńyna shyǵyp bara jatqanda alpınısterdiń biri kóziniń nurly qabyǵyn úsitip alǵan bolatyn. Sonyń saldarynan sportshy kórý qabiletinen ishinara aırylyp qaldy.
