Almatynyń taý bókterine kópqabatty úı salý toqtatyldy - Bekqalı Torǵaev
ALMATY. QazAqparat - Elbasy tapsyrmasynan keıin ál-Farabı kóshesinen joǵary taý bókterinde birde bir kóp qabatty turǵyn úı salynǵan joq. Bul týraly búgin Almaty qalasy Óńirlik kommýnıkatsııalar qyzmeti alańynda Bostandyq aýdanynyń ákimi Bekqalı Torǵaev aıtty, dep habarlaıdy QazAqparat tilshisi.
«2016 jyldyń basynda berilgen Elbasy Nursultan Nazarbaevtyń tapsyrmasynan keıin ál-Farabı kóshesinen joǵary qaraı kóp qabatty úıler salynǵan joq. Qalalyq máslıhat depýtattary osy tapsyrmaǵa sáıkes taý bókterinde salynatyn úılerdiń bıiktigi 12 metrden aspaý qajet degen sheshim qabyldaǵan bolatyn. Qala qurylysy keńesinde osydan keıin birde bir joba oryndalǵan joq. Elbasy tapsyrmasyna deıin sheshim alǵandarǵa monıtorıng júrgizdik. Bizdiń aýdanda «Bazıs» kompanııasynyń 7 qabatty úı salý jobasy bar edi, sony 3 qabatqa shegerdik», - dedi aýdan ákim.
Sonymen qatar, aýdan ákimi 2017 jyly Bostandyq aýdanynda Elbasynyń «Bolashaqqa baǵdar: rýhanı jańǵyrý» maqalasyn iske asyrý maqsatynda 10-nan astam jobalar maquldanyp, júzege asyrylǵanyn aıtty.
«Bıylǵy jyly aýdanymyzda 14 jańa balalarǵa arnalǵan sport alańdary ashyldy. Birqatar kósheler abattandyryldy. Tól mádenıetimizdi dáripteý maqsatynda jastar arasynda «Jas órken» festıvali uıymdastyryldy. Birqatar kóshelerdiń ataýy ózgerdi. Ózderińiz jaqsy biletindeı bizdiń aýdannyń magıstraldy, basty kósheleriniń biri - burynǵy Fýrmanov kóshesine Elimizdiń tuńǵysh Prezıdenti Nursultan Ábishuly Nazarbaevtyń esimi berildi. Bul bizdiń qalamyz úshin, onyń ishinde aýdan turǵyndary úshin zor maqtanysh, úlken abyroı», - dedi ol.
Bekqalı Torǵaevtyń aıtýynsha, 2017 jyldyń qańtar-qazan aılaryna sáıkes, Bostandyq aýdanynda memlekettik kirister kólemi 273,6 mlrd. teńgeni qurap otyr.
«Jospar 74,0% oryndaldy. Onyń ishinde respýblıkalyq - 182,2 mlrd teńge (67,0%) bolsa, jergilikti - 91,4 mlrd. teńge (90%)», - dedi ákim.
Qazirgi tańda, Bostandyq aýdanynda jalpy sany 44 iri jáne orta, 884 kishi kásiporyndar tirkelgen. Almaty qalasy boıynsha Bostandyq aýdanynda kásiporyn ónimderiniń úlesi 10,4% quraıdy.
«Aǵymdaǵy jyldyń qańtar-qazan aılary aralyǵynda negizgi kapıtalǵa quıylǵan ınvestıtsııalar kólemi 119,9 mlrd. teńgege jetti. Byltyrǵy kórsetkishpen salystyratyn bolsaq 125% ósip otyr (95,9 mlrd. teńge)», -dedi B.Torǵaev.
Aýdan ákimi baıandamasynda Bostandyq aýdanynda 24 836 kásiporyn tirkelgenin, qazirgi tańda olardyń 12 896 turaqty jumys isteıtinin aıtty.
