Almatynyń tártip saqshylary qaraqshylyq shabýyl jasaýshylardy ustady
ALMATY. 18 naýryz. QazAqparat /Ádilet Musahaev/ - Almaty polıtseıleri qaraqshylyq shabýyl jasaýshylardy quryqtady.
Tún ortasynda úıine qaıtyp kele jatqan qalanyń «Jetysý» yqsham aýdanynyń turǵyny qaraqshylardyń qurbanyna aınalǵan.
Almaty qalasy Áýezov aýdany ІІB bastyǵy, polıtsııa polkovnıgi Nurlan Almasbekovtyń aıtýynsha, álgi azamatty úıiniń kire berisinde betine qara betperde kıgen eki beıtanys toqtatyp, sózge kelmesten soqqynyń astyna alǵan. Odan keıin tapansha kezep, aqshasyn, uıaly telefonyn jáne qol saǵatyn berýdi talap etedi.
"Áýezov aýdanynda jurtshylyq tyǵyz ornalasqan. Sondyqtan qoǵamdyq tártipti saqtaý úshin polıtsııa sholǵynshylary men basqa da keshendi kúsh kóp jumyldyrylǵan. Atalǵan oqıǵada «Boran-058» sholǵynshy ekıpajy turǵyn úılerdiń alańyn tekserý barysynda kúdikti topty ańǵaryp qalady. Jaqyndaı kele olardyń tonaýshylar ekenin baıqap, quryqtaý úshin qajetti shara qoldanǵan", -deıdi N.Almasbekov.
Ustalǵandardyń ekeýi de jumyssyz júrgen Almaty oblysynyń turǵyndary bolyp shyqqan.
"Bolǵan oqıǵany saralaı kele, ustalǵandar qylmystyq ispen burynnan aınalysyp kelgen degen oıdamyz. Olar bastan-aıaq qara kıingen jáne túrlerin tanyp qalmas úshin qurbandaryna qarańǵy tasadan shabýyl jasaǵan" - dep atap ótti polkovnık N.Almasbekov.
Atalǵan derek boıynsha qylmystyq is qozǵaldy. Ustalǵandar ýaqytsha oqshaýlaý bólmesine jetkizilgen. Sondaı-aq olardyń basqa da qylmysqa qatystary bar-joqtyǵy tekserilip jatyr.
