Almatynyń tártip saqshylary iri kólemdegi alaıaqtyq isti áshkereledi
ALMATY. 13 shilde. QazAqparat /Ádilet Musahaev/ - Almatynyń tártip saqshylary iri kólemdegi alaıaqtyq isti áshkereledi, dep habarlady qalanyń ІІD baspasóz qyzmeti.
Ózin kásipker retinde tanystyrǵan 57 jasar Zýhra qylmystyq ortada bankterden kepildikte turǵan páterlerdi arzan baǵamen alyp berýde múmkindigi bar ekendigin málimdeýmen kózge túsken. "Osy ýaqytta bul áıel lombardtardyń biriniń dırektory bolyp, elderge qaryz bergen. Alǵashqy kezde ol óz klıentinen eki bólmeli páter alyp berem dep 60 myń dollar alǵan, odan ári elıtalyq úıler úshin iri kólemde qarajattar ala bastaǵan. Aqshany alý barysynda ol satyp alý men satý týraly kelisim-shartqa otyryp, óz JShS-niń resmı rekvızıti men mórlerin qoryqpaı paıdalanǵan. Ýaqyt óte kele jábirlenýshiler alaıaqtyń quryǵyna ilikkenin sezedi", - deıdi Medeý aýdany JPB-nyń bastyǵy polkovnık Baqyt Qasabekov.
Aldanǵan azamattar polıtsııa kómegine júgingen. Keshendi túrde júrgizilgen jedel-izdestirý sharalarynyń arqasynda tártip saqshylary alaıaqty ustady. "Ol ylǵı da turǵylyqty jerin aýystyryp otyrǵan. Osy aralyqta bizge alaıaqtyń quryǵyna ilikkender kóptep shaǵymdana bastady. olardyń sany búgin 20-ǵa jetip otyr. Basynda kúdikti jurttan aqsha alǵandyǵyn joqqa shyǵaryp, qarsylyq kórsetti. Degenmen naqty dálelderdiń kóptiginen ol taǵylǵan barlyq aıypty túgeldeı moıyndady", - dep atap ótti polkovnık.
Kóptegen adamdardy aldap, olardyń obalyna qalǵan áıel qazirgi sátte sot sanktsııasymen qamaýda otyr. Osy is boıynsha QR QK-nyń 177-babyna saı tergeý jumystary úrgizilýde.
