Almatynyń tarıhı ortalyǵyndaǵy 24 jer ýchaskesi memleketke qaıtarylady
ALMATY. QazAqparat – Almatyda jekelegen nysandardyń qurylysy toqtatylyp, ruqsat qujattary qaıtaryp alyndy. Bul týraly brıfıng barysynda qalalyq Josparlaý jáne ýrbanıstıka basqarmasynyń basshysy Almashan Ahmedjanov aıtty, dep habarlaıdy QazAqparat tilshisi.
Almashan Ahmedjanov atap ótkendeı, qazirgi ýaqytta Almatynyń tarıhı ortalyǵy sheginde jeke menshik ıeliktegi 36 jer ýchaskesi anyqtaldy. Ýchaskeler 2 topqa bólingen: qurylysy bastalǵan jáne bos jatqan. 14 ýchaskede qurylys bastalǵan, onyń ishinde 3 obektide jumystar toqtatyldy jáne ruqsat qujattary qaıtaryp alyndy. Turǵyndardyń ótinishterin eskere otyryp, 11 obekt boıynsha qajetti usynymdar berildi (jol júrý, abattandyrý, qabattar sany boıynsha syzbalaryn uıymdastyrý jáne taǵy basqa).
Bos jatqan 22 jer ýchaskesi boıynsha mynalar sheshildi: 8 ýchaskeni qaıta satyp alyp, aýmaqty abattandyrý, kógaldandyrý jáne qoǵamdyq keńistikterdi uıymdastyrý; 14 ýchaske boıynsha qala qurylysyna shekteýler belgilendi: jasyl jelekterdi kesýge tyıym salý, qoldanystaǵy qurylystardy eskere otyryp, qabattardy shekteý, fýnktsıonaldyq paıdalaný boıynsha shekteý.
Sondaı-aq atap ótilgendeı, tarıhı ortalyqtyń shekarasy sheginde ornalasqan jáne ıgerilmegen 24 jer ýchaskesin qalanyń kommýnaldyq menshigine satyp alý usynylyp otyr.
Olardyń ekeýi Almaty qalasynyń problemalyq nesıeler qorynan jer berý arqyly qala qoryna aýysty. Bul Abylaıhan – Qurmanǵazy, Panfılov – Shevchenko kóshelerinde.
Almasbek Ahmedjanov Almatynyń tarıhı ortalyǵynda «núkteli» qurylysty toqtatý týraly sheshim qabyldanǵanyn jetkizdi.
«Biz tereń taldaý júrgizdik. Qoldanystaǵy zańnamanyń talaptaryn eskermesten bir nárse alý, ózgertý jáne toqtatý múmkin emes edi. Bas jospardy túzetýdiń aıaqtalý kezeńinde qoldanystaǵy zańnamada qoldanýǵa bolatyn barlyq materıaldar jınaldy jáne tereń taldaý júrgizilgennen keıin Almaty qalasynyń ákimi qalanyń ortalyq bóligindegi sáýlet-qurylys qyzmetin retteý úshin tıisti tapsyrma berdi», - dedi A.Ahmedjanov.
Onyń aıtýynsha, sońǵy eki jylda Almatynyń tarıhı ortalyǵynda nysandar salýǵa ruqsat berilgen joq. Ruqsatty qaıtaryp alý júrgizilgen jáne qurylys jumystary toqtatylǵan. Qazir bul jer ýchaskeleri memleket menshigine qaıtarylatyn bolady. 2018 jylǵa deıin salyna bastaǵan nysandar aıaqtalý satysynda.
Tarıhı ortalyqta bıik ǵımarattar salýǵa tyıym salynbaq. Bos jer ýchaskelerindegi buryn buzylǵan tarıhı ǵımarattar birtindep qalpyna keltiriledi.
Mysaly, Panfılov-Tóle bı kóshesinde úsh qabatty nysandy – mınıstrliktiń burynǵy ǵımaratyn, keıinnen ınstıtýt pen kásipkerlik qyzmeti nysanyn qalpyna keltirý usynyldy. Sondaı–aq, Qazybek bı-Qaldaıaqov qıylysyndaǵy buryn «8 marta Sovetskoe» dep atalǵan Sáýletshiler odaǵynyń eki qabatty ǵımaratyn qalpyna keltirý usynylǵan.
Eske salaıyq, Almaty qalasynyń ákimdigi Qalanyń bas josparyna sáıkes tarıhı ortalyqtyń shekarasyn anyqtady:
- ońtústik jaǵynan Abaı dańǵyly boıynsha
- shyǵys jaǵynan Qarmysov jáne Qaıyrbekov kóshelerimen Gogol kóshesine deıin
- Gogol kóshesi boıymen Buzyrbaev kóshesine deıin
- Maqataev kóshesimen Panfılov kóshesine deıin
- Panfılov kóshesimen Raıymbek dańǵylyna deıin
- Raıymbek dańǵylymen batys baǵytta Seıfýllın dańǵylyna deıin,
- Seıfýllın dańǵylynan Jibek joly kóshesine deıin
- Jibek joly kóshesi boıymen Masanshy kóshesine deıin
- Dosmuhamedov jáne Baıtursynov kóshelerimen Jambyl kóshesine deıin
- Jambyl kóshesi boıymen shyǵys baǵytta Muqanov kóshesine deıin,
- Jeltoqsan kóshesimen Abaı dańǵylyna deıin.
