Almatynyń tarıhı kelbetin saqtaý: Ortalyqta 69 úıdiń qasbeti jóndeldi

ALMATY. QazAqparat - Almaty qalasy Almaly aýdany ákiminiń mindetin atqarýshy Arhat Omarov óńirlik kommýnıkatsııalar qyzmetindegi brıfıngide megapolıs ákimi Baqytjan Saǵyntaevtyń qalanyń tarıhı ǵımarattarynyń kelbetin saqtaý jónindegi tapsyrmasynyń oryndalý barysy jaıly aıtty, dep habarlaıdy QazAqparat tilshisi.

Bıyl kóppáterli úılerdiń 69 qasbetine jóndeý jumystary júrgizildi. Kelesi jyly Almaly aýdanynda 50 úıdiń qasbetin jóndeý josparlanyp otyr.

Sonymen qatar, mádenı ortany damytý maqsatynda Jazýshylar Odaǵynyń ǵımaratyn jóndeý, № 4 kitaphana men Chehov atyndaǵy qalalyq kitaphanany jańǵyrtý jumystary aıaqtaldy.

«Abylaı han dańǵylynda ornalasqan Jazýshylar Odaǵynyń tarıhı ǵımaraty boıynsha jumystar 2019 jyly bastaldy. Búgingi tańda barlyq jumystar 100% aıaqtaldy. Kúrdeli jóndeý jumystary aıasynda shatyr, jeli jáne ishki árleý tolyǵymen jóndeldi», - dedi Arhat Omarov.

Qazaqstannyń eńbek sińirgen qaıratkeri, QR Jazýshylar odaǵynyń tóraǵasy Ulyqbek Esdáýlet Almaty qalasynyń ákimdigine ınfraqurylymdy jańǵyrtý máselesin sheshkeni úshin alǵys bildirgen edi. Onyń aıtýynsha, jóndeý jumystary Jazýshylar úıiniń negizgi ǵımaratynda da, májilis zalynda da júrgizilgen.