Almatynyń sulýlyq salondary karantın aıasynda qalaı jumys istep jatyr
ALMATY. QazAqparat - Almatyda búginnen bastap bólek ǵımaratta ornalasqan sulýlyq salondary men bilim ortalyqtary jumysyn bastady, dep habarlaıdy QazAqparat tilshisi.
Alaıda, qaladaǵy ShOB nysandarynyń basym kópshiligi áli ashylmaǵan.
Karantın rejımi aıasynda shaǵyn jáne orta bıznes sýbektileri qalaı jumys istep jatqanyn bilý úshin 7 sulýlyq salonyn aralap kórdik.
Sulýlyq salondarynda qazir tek shash qııý qyzmeti ǵana kórsetilip jatyr.
Ákimshilerdiń aıtýynsha, halyq tarapynan suranys azaıǵan.
«Suranys azaıdy. Klıent joq. Maǵan búgin tek 7-9 adam ǵana jazyldy. Tek aldyn ala jazylý arqyly qabyldap jatyrmyz. Manıkıýr 2000 tg, pedıkıýr – 3500 tg, shash kesý 1500 tg. Shash boıaý sııaqty qyzmetterdi ýaqytsha toqtattyq. Barlyq qajetti sanıtarlyq talaptardy saqtaýǵy tyrysyp jatyrmyz. Tańerteńgi 10:00-17.00 aralyǵynda jumys istep jatyrmyz», - dedi salondardyń biriniń qojaıyny.
Kóptegen shashtarazdar klıentterden maska taǵýyn talap etip jatyr.
«Qolymyzdy antıseptıkpen tazalap jatyrmyz», - dedi sheberlerdiń biri.
Aıta ketý kerek, Almatyda shashtarazdar jumysyn sulýlyq salondarynan erterek, 4 mamyrdan bastaǵan bolatyn.
Munyń aldynda qala ákiminiń orynbasary Saparbek Tuıaqbaev qalada 2000-ǵa jýyq sulýlyq salony baryn málimdegen bolatyn.
Ákimdik ókili olarǵa qoıylatyn talaptardy jarııalaǵan.
Sulýlyq salondary Sall centre (+7 775 882 55 39, +7 775 882 57 08, +7 775 882 55 46, +7 775 882 54 16, +7 775 882 56 02, +7 775 882 53 12, +7 775 882 56 49, +7 775 882 52 00, +7 775 882 56 72, +7 775 882 53 92) arqyly habarlasyp aýdıt ótkizgen soń ǵana jumysyn bastaı alady.
Sondaı-aq, olar aýdıtke elektrondy poshta (Infoalatau@mail.kz – Alataý aýdany, Infoalmaly@mail.kz – Almaly aýdany, Infoauezov@mail.kz - Áýezov aýdany, Infobostandyk@mail.kz - Bostandyq aýdany; Infozhetysu@mail.kz – Jetisý aýdany; Infomedeu@mail.kz - Medeý aýdany, Infonauryzbay@mail.kz – Naýryzbaı aýdany, Infoturksib@mail.kz – Túrksib aýdany) arqyly aýdıtke ótinish qaldyra alady.
Odan keıin shaǵyn kásipkerler infoalmaty.kz saıtynda tirkeýden ótýi tıis.
Almaty ákimdigi janyndaǵy tótenshe jaǵdaı rejımin qamtamasyz etý jónindegi Jedel shtab qala aýmaǵynda karantın rejıminiń saqtalatynyn málimdegen bolatyn.
Bul rette karantın rejımi aıasyndaǵy shekteý sharalary 11 mamyrdan bastap Shtabtyń erekshe ókimine deıin jalǵasady.
