Almatynyń sýdıasy alaıaqtyq úshin jaýapqa tartyldy

ASTANA. QazAqparat - Sybaılas jemqorlyqqa qarsy is-qımyl ulttyq bıýrosy men Joǵarǵy sottyń ishki qaýipsizdik qyzmeti alaıaqtyq jasaǵan sýdıany ustady, dep xabarlaıdy QazAqparat tilshisi QR Memlekettik qyzmet isteri jáne sybaılas jemqorlyqqa qarsy is-qımyl agenttigine silteme jasap.

Qoǵammen baılanys departamentiniń dırektory Arman Berdalınniń aıtýynsha, Almaty qalasy Áýezov aýdandyq sot sýdıasynyń alaıaqtyq áreketi áshkerelendi.

«Ol jaýapty memlekettik laýazymdy atqara otyryp, óz ónidirisine jatpaıtyn azamattyq ister boıynsha arest salynǵan jyljymaıtyn múlik aýyrtpalyǵyn alyp tastaımyn degen. Osy máseleni sheshý úshin aldaý jolymen jeke tulǵadan 10 myń AQSh dollary somasynda aqsha alǵany úshin kúdikke ilindi. Tergeý jalǵasýda», - dedi A.Berdalın Astanada ótken baspasóz máslıxatynda.

Aıta keteıik, búgin agenttik Mańǵystaý oblysynyń deneshynyqtyrý jáne sport basqarmasy basshysynyń qamaýǵa alynǵanyn jarııalady. Ol memleket múddesine 1 mıllıard teńgeden astam somaǵa zalal keltirgen. Budan bólek, aǵaıyndy Rysqalıevterdiń sybaılasy qamaýǵa alyndy. Qyzylordada oblystyq basqarma basshysynyń orynbasary ekstremızmge qarsy sharalarǵa bólingen bıýdjet qarjysyn jymqyrǵan. Al Stepnogor qalasynda qoǵamdyq densaýlyqty saqtaý basqarmasynyń basshysy paramen ustaldy.