Almatynyń sý basqan aýdandarynda apattyq-qutqarý jumystary aıaqtaldy
ALMATY. QazAqparat - Almatynyń sý basqan aýdandarynda apattyq-qutqarý jumystary aıaqtaldy. Endi budan ári qaraı, sý tasqyny saldaryn joıý jumystaryn qala aýdandarynyń kommýnaldyq qyzmetteri júrgizetin bolady.
Almaty qalalyq TJD baspasóz qyzmetiniń habarlaýynsha, Alataý men Jetisý aýdandarynda sý sorǵyshtar arqyly laı sýdy tartyp shyǵarý jáne úıler men aýlalardy, jertólelerdi, baqshalardy, kóshelerdi laı úıindisi men qatty turmystyq qaldyqtardan tazartý jumystary aıaqtaldy. Sondaı-aq, aryq júıesi tazartylyp, tereńdetildi. Qaraǵaıly ózeniniń 10 kópirlik ótkelindegi arnasy keńeıtildi. Sýdy buryp aparatyn sý arnasy jasalyp, ol qum salynǵan qaptarmen ýaqytsha nyǵaıtyldy.
Aıta ketelik, Alataý men Jetisý aýdandarynda sý tasqyny saldaryn joıýǵa Almaty qalalyq TJD, qalalyq jáne aýdandyq atqarý organdary, azamattyq qorǵanys qyzmetteri, jergilikti polıtsııa qyzmetteri, QR ІІM Ulttyq ulany jáne Almaty garnızonynyń áskerı quramalarynyń jeke quramy men tehnıkalary jumyldyrylǵan bolatyn.
