Almatynyń sot aktilerin oryndaý qyzmeti zań buzýshylyqtarǵa júıeli túrde jol berip otyrǵan - QR Bas prokýratýrasy
TANA. 3 qarasha. QazAqparat /Marlan Jıembaı/ - Almatynyń sot aktilerin oryndaý qyzmeti zań buzýshylyqtarǵa júıeli túrde jol berip otyrǵan. Bul týraly búgin Bas prokýratýranyń resmı ókili Nurdáýlet Súıindikov málim etti.
Almaty qalasynyń sot aktilerin oryndaýshylarynyń óndirisinde barlyǵy jalpy somasy shamamen 500 mln. teńge bolatyn 300 myńǵa jýyq tyıym salynǵan nysandarǵa qujattar bar ekendigin atap ótken resmı ókil: «Múlikterdi tárkileý týraly máseleni sheshýdi sozbalańǵa salý saqtaý qyzmeti úshin tólem retinde bıýdjet qarajattaryn negizsiz shyǵyndaýǵa ákep soǵýda. Máselen, 2010 jyly tárkilengen múlikterdi saqtaý jónindegi shyǵystar 7,4 mln. teńgeni qurasa, al múlikterdi satýdan bıýdjetke barlyǵy 12,5 mln. teńge ǵana túsken», - dedi.
Onyń atap óýtinshe, jekelegen jaǵdaılarda joıylýǵa jatatyn zattardy uzaq ýaqyt saqtaýǵa da jol berilýde. Atap aıtqanda, 13 myń bótelke bolatyn alkogol ónimderi shamamen 5 aı saqtalyp, keıin joıylǵan. Olardy saqtaýǵa arnalǵan shyǵystar shamamen 1 mln.teńgeni quraǵan.
«Іshinara tekserý memleket kirisine tárkilengen 50 mln.teńgeden astam soma bolatyn múliktiń jetispeýshiligin jáne joq ekendigin anyqtady.
Osy fakti boıynsha Almaty qalalyq prokýratýrasy QK 357-baby boıynsha qylmystyq is qozǵady, tergeý júrgizilýde. Jalpy, tekserý nátıjeleri sot oryndaýshylarynyń zań buzýshylyqtarǵa júıeli túrde jol berip otyrǵandyqtaryn rastaıdy. Anyqtalǵan zań buzýshylyqtardy, sondaı-aq olarǵa yqpal etken sebepter men saldarlardy joıý maqsatynda Bas prokýratýra Qazaqstan Respýblıkasynyń Ádilet mınıstrligine usynys engizdi, olardy qaraý nátıjesi boıynsha Almaty qalasynyń atqarýshylyq is júrgizý organdarynyń birqatar laýazymdy tulǵalary tártiptik jaýapkershilikke tartyldy», - dedi N.Súıindikov.
