Almatynyń soltústigi men ońtústigin jańa kólik estakadasy jalǵaıdy

ALMATY. QazAqparat - Almatyda temirjol boıymen estakada arqyly Nazarbaev dańǵylyn Jansúgirov kóshesine deıin úńgileý jumystary aıaqtaldy. Qala ákimi Baýyrjan Baıbek «soltústik-ońtústik» baǵyty boıynsha Seıfýllın dańǵylynyń júktemesin azaıtatyn jańa jol aıryǵyn kórdi, dep habarlaıdy QazAqparat tilshisi.

Tehnıkalyq jaǵynan kúrdeli jobany júzege asyrý úshin  7,4 mlrd teńge jumsaldy. Qurylys eki jylǵa sozylyp, 500 adam qosymsha jumyspen qamtyldy.

Endi bul jolmen táýligine 48 myń kólik júre alady.

Estakadanyń tirek qondyrǵylary men qabyrǵalaryn turǵyzý úshin 7 myń tekshe metr beton jáne 4 myń tonnadan astam metall qurastyrylymy paıdalanyldy.

Qala ákimi Baýyrjan Baıbek jaıaý júrginshi ınfraqurylymyn qurý jáne qoǵamdyq kólikti damytýmen qatar qalada kólik júrgizýshileriniń jaǵdaıyn jaqsartý da qolǵa alynǵanyn aıtty.

Ol úshin jol aıryqtary salynyp, joldar jóndelip jatyr. Birjaqty qozǵalys engizilýde.

Adamdardyń mobıldiligi artyp, bıznestiń logıstıkalyq shyǵyny tómendep keledi.

«Prezıdentimizdiń saıasaty arqasynda Almaty turaqty damyp, ekonomıkalyq jaǵynan ósip jatyr. Sońǵy on jyl ishinde 30 jol aıryǵy ashyldy, jańa úıler salynýda, qalanyń tarıhı ortalyǵy jańardy. Bıznes órken jaıýda. Mine, munda sizderdiń úlesterińiz aıtarlyqtaı, atqarylǵan isterdiń barlyǵy jumysshylar eńbeginiń nátıjesi. Jańa jol aıryǵy Tuńǵysh Prezıdent kúni qarsańynda qala turǵyndaryna jasalǵan úlken syılyq», - dedi Baýyrjan Baıbek.

Aıta keterligi, uzyndyǵy 800 metr bolatyn estakadamen búgin júrgizýshilerdiń alǵashqy legi ótip kórdi.