Almatynyń shlagbaýmy bar kólik turaqtarynda plastıkalyq karta qoldanylmaq
ALMATY. QAZAQPARAT - Almaty qalasynda shlagbaýmy bar kólik turaqtarynda qaǵaz túrindegi aılyq abonementterdiń ornyna plastıkalyq «Mifare» smart-kartacymen tólem jasaýǵa bolady, dep habarlaıdy QazAqparat «Almaty SpetsTehParkıng Servıs» JShS-ǵa silteme jasap.
Avtokólik ıelerine karta tegin beriledi. Smart-kartany parkıng alańdarynda ornalasqan termınaldardan alýǵa bolady.
Abonementtiń aılyq baǵasy 6 myń teńgeni qurap otyr. Bul parkıngke kún saıyn tólegennen (táýligine 300 teńge, 30 kúnge eseptegende parkıngtiń aılyq baǵasy - 9 myń teńge) áldeqaıda tómen baǵa.
Júrgizýshi kóligin kartany alǵan parkıngke qansha ýaqytqa qoısa da óz erki. Bul rette abonementti qaı kólik turaǵynan alsa, tek sol jerde ǵana jaramdy ekenin eskergen jón jáne ony aı saıyn toltyryp otyrýǵa bolady.
Shlagbaýmy bar parkıngter tizimi mynadaı: qalanyń Soltústik aınalymy janyndaǵy bazarlar: Adem, Aqbulaq, Alataý 1, Alataý 2, Barys, Batyr, Bolashaq, Olja, ıAlıan, «Nurly Taý» bıznes ortalyǵy, «Mıras» mektebi.
