Almatynyń shetki shaǵynaýdandarynda ınjenerlik ınfraqurylymdardyń qurylysy jalǵasýda
ALMATY. QazAqparat – Almaty ákimi Baqytjan Saǵyntaev qalanyń jańa yqshamaýdandarynda salynyp jatqan ınjenerlik ınfraqurylymdardyń qurylysymen tanysty, dep habarlaıdy QazAqparat tilshisi.
«Qalaǵa jańadan qosylǵan kentterdiń turǵyndary, birneshe jyldan beri kommýnaldyq-turmystyq jaǵdaıdyń jaqsarýyn kútti. Qala turǵyndarynyń ótinishterin eskerip, ótken jyly shet aımaqtardy damytýǵa baǵyttalǵan «Jańa Almaty» keshendi josparyn ázirledik», - dep jazdy Baqytjan Saǵyntaev Instagram – daǵy paraqshasynda.
Keshendi jospardaǵy mindetterdiń qalaı iske asyp jatqanyn qala ákimi Túrksib aýdanyna jasaǵan jumys sapary barysynda kórdi. «Qaırat», «Álmerek» pen « Nurshashqan» yqshamaýdandarynda jyl sońyna deıin 150 shaqyrymnan astam sýmen qamtý jáne sýdy burý jelilerin salý josparlanǵan. Sapaly aýyz sýmen 12 myń turǵyn qamtamasyz etiledi. Jeliler tóselgennen keıin jol jamylǵysy da retke keltiriledi.
Budan bólek, « Álmerek», «Qaırat», «Maıak», «Jas Qanat», tómengi Pıatıletka, «Nurshashqan» sııaqty alty yqshamaýdandaǵy 614 kóshege syrtqy jaryq júıeleri ornatylady.
«Aýdandaǵy 12 kóshedegi 9,3 shaqyrym bolatyn jol ortasha jóndeýden ótken. 2021 jyly «Nurshashqan» yqshamaýdanyndaǵy 25 kóshede 5,1 shaqyrymǵa jetetin jańa jol salý josparlanýda. Qala turǵyndarynyń ómir súrý ortasyn jaqsartý jumystary jalǵasýda», - dep atap ótti megapolıs basshysy.
