Almatynyń shetki shaǵyn aýdandarynda jańa jol salynady
Qala ákimi Erbolat Dosaevtyń tóraǵalyǵymen ótken keńeske ákimdiktiń beıindi basqarmacy men vedomstvolyq baǵynysty uıymynyń basshylary, aýdan ákimderi, jol qurylysy salasynda tehnıkalyq qadaǵalaýdy júzege asyratyn merdigerlik uıymdar men kompanııalardyń ókili qatysty.
Shahar basshysy qys mezgilinen keıin qala turǵyndary joldyń qazirgi jaǵdaıyna narazylyq týdyratynyn atap ótti.
«Shuńqyrlardyń paıda bolýyna, lıýkterdiń túsýine jáne qysta kommýnaldyq kásiporyndardyń apatty jáne josparly qazýlar júrgizýine baılanysty joldardy aǵymdaǵy jóndeýdi júrgizý máselesi ótkir tur. Turǵyndar tarapynan jumystyń keshigýine baılanysty kóshelerdiń uzaq jabylýyna qatysty turaqty jáne ádil shaǵym bar. Jumystarǵa selqos qaraý, formalızm jáne sapa deńgeıiniń tómendigi, bekitilgen standarttar, tájirıbe kórsetkendeı, oń nátıje bermeı otyr. Qalaǵa sapaly jol qajet. Jumysty durys júrgize almaıtyn kompanııalar endi qalada jol jóndeý jumysymen aınalyspaıdy», - dedi qala ákimi.
Almaty ákimi merdigerlik uıymdar ótken jyly jibergen barlyq kemshilikti qysqa merzimde joıýdy tapsyrdy. Qala ákiminiń tapsyrmasy boıynsha turǵyndardy aldyn ala habardar etý jáne protsesterdiń ashyqtyǵyn, merdigerlik uıymdardyń eseptiligi men tártibin arttyrý úshin vedomstvolyq saraptamadan ótkennen keıin ýchaskeler men oryndaý merzimderi kórsetilgen jumys kestesi jarııalanatyn bolady.
Sondaı-aq ol 2023 jyly qalanyń 5 shaǵynaýdanynda (Qaırat, Alǵabas, Aqjar, Shuǵyla jáne Shańyraq-1) jańa jol salynatynyn jetkizdi.
«Qalada ortasha jóndeýmen uzyndyǵy 200 km-den asatyn 220 kóshe, aǵymdaǵy jóndeýmen 350 myń sharshy metrden astam kóshe qamtylady. Bul maqsattarǵa tıisinshe 20 mlrd teńge jáne 2,8 mlrd teńge bólindi. Sondaı-aq, uzyndyǵy 30 km trotýarlar men 40 aıaldama keshenin jóndeý josparlanyp otyr»,- dedi ol.
Erbolat Dosaev bıyldan bastap ókilettikterdi ortalyqsyzdandyrý jáne jekelegen bıýdjetti aýdan ákimdikterine bólý aıasynda jol tóseminiń aǵymdaǵy jóndelýi men jaı-kúıi úshin aýdan ákimdikteri jaýapty bolatynyn atap ótti.
Qala basshysy olardy joldaǵy kemshilikterdi joıý boıynsha jedel shara qabyldaýǵa mindettedi.
Sonymen qatar, ol jol tóseminiń sapasyn qamtamasyz etý jáne merzimderdi saqtaý úshin ınjenerlik jelilerdi tóseý jáne joldy keıinnen jóndeý jumystaryn sınhrondaý qajettigin tilge tıek etti.
Energetıka jáne sýmen jabdyqtaý basqarmasyna turǵyndar men jeke kompanııalar tarapynan keıingi jer qazýfnfń aldyn alý úshin ınjenerlik jelilerdi abonentke tikeleı jetkizýdi qamtamasyz etý tapsyryldy. Aýdan ákimdikterine turǵyndar arasynda aqparattyq jumysty kúsheıtý tapsyryldy joldy jóndeý jáne salý ınjenerlik jelilerdi salý jumystary aıaqtalǵannan keıin ǵana múmkin jáne oryndy bolady.
Keńes barysynda Erbolat Dosaev búginde joldyń eń ózekti máseleli lıýkter ekenin atap ótti. Olardyń sapasyzdyǵyna jáne tóseý tehnologııasynyń buzylýyna baılanysty asfalt barlyq jerde shógedi, shuńqyrlar, ketikter men jaryqtar paıda bolady.
Mundaı jaǵdaılardyń aldyn alý úshin byltyr testilik rejımde qalada shetelde qoldanylatyn «qalqymaly» korpýstary bar jańa tehnologııa boıynsha 25 lıýk ornatyldy. Halyqaralyq tájirıbe negizinde asfalttyń oıyq túzilýin tómendetý úshin Gogol kóshesiniń úsh ýchaskesinde polımerlerdi qoldana otyryp, asfaltbeton qospasyn pılottyq paıdalaný boıynsha synaqtar jalǵasýda.
Jańa sheshimder óziniń tıimdiligin kórsetti jáne kúzgi-qysqy kezeńde júktemelerge tótep berdi.
Erbolat Dosaev olardy ortasha jóndeý jáne jańa joldar salý kezinde keńinen qoldanýdy tapsyrdy.
Keńes barysynda joldardaǵy qaýipsizdik máselelerine erekshe nazar aýdaryldy. Aǵymdaǵy jyly 220 mekteptiń janynda 270 rettelmeıtin jaıaý júrginshiler ótkeli jaryqtandyrylady. Ortasha jóndeý sheńberinde Vision Zero tujyrymdamasy aıasynda jol qozǵalysyna qatysýshylardyń qaýipsizdigin qamtamasyz etý jónindegi jumystar jalǵasatyn bolady.
Qala ákimdigi qaýipsizdik bólikterin ornatý jáne velosıped jolaqtarynda 4 myń sıgnaldyq bollard ornatý jumystary kózdelgen. 179 nysanda rettelmeıtin jaıaý júrginshiler ótkelderi ornalasqan jerlerde dybys jolaqtaryn salý josparda.
Merdigerlik uıymdardyń úzdiksiz jumysyn qamtamasyz etý, sondaı-aq jaýapkershilik aımaǵyn arttyrý úshin Almaty ákimi 3 jyl merzimge jol júrisi qaýipsizdigin qamtamasyz etý (jol júrisin retteýdiń tehnıkalyq quraldaryna qyzmet kórsetý jáne ustaý) jónindegi jumystarǵa shart jasasýdy qamtamasyz etýdi tapsyrdy.
Jalpy, «Almaty qalasyn 2025 jylǵa deıin damytý baǵdarlamasy jáne 2030 jylǵa deıingi orta merzimdi perspektıvalaryn» iske asyrý aıasynda aǵymdaǵy jyly avtomobıl joldarynyń úlesin jaqsy jáne qanaǵattanarlyq jaǵdaıda 89%-ǵa (2022 jyly – 86%), 2025 jylǵa qaraı 95%-ǵa deıin jetkizý josparda tur.
Keńes sońynda Erbolat Dosaev jumystardyń sapasyn baqylaýdy kúsheıtýdi, merdiger uıymdardyń qurylys-jóndeý normalaryn saqtaýyn qamtamasyz etýdi jáne sharttyq mindettemeler oryndamaǵan jaǵdaıda – josyqsyz merdigerler tizimine engizýdi, materıaldardy quqyq qorǵaý organdaryna berýge deıin qatań sharalar qabyldaýdy tapsyrdy. Merdigerlik uıymdar jumys sapasyn arttyrý boıynsha sharalar qabyldaýǵa jáne atqarylǵan jumys úshin jaýapqae tartylýǵa mindettendi.
Buǵan deıin, Almatyda eki júzden astam kóshe jóndeýden ótetini týraly jazǵan bolatynbyz.
