Almatynyń shetki aımaqtarynda 40 shaqyrymnan astam jańa jol salyndy

ALMATY. QazAqparat – Almaty ákimi Baqytjan Saǵyntaev Ortalyq kommýnıkatsııalar qyzmetinde ótken brıfıngte «Jańa Almatynyń» shetki aımaqtaryn damytýdyń keshendi josparyn júzege asyrý jóninde aıtty, dep habarlaıdy QazAqparat tilshisi.

Onyń aıtýynsha, ınjenerlik ınfraqurylymdy damytý aıasynda bıyl 300 shaqyrymǵa jýyq sý qubyry men káriz jelisi tartyldy.

Nátıjesinde «Jańa Almaty» yqshamaýdandarynyń 50 myń turǵyny ortalyqtandyrylǵan aýyz sý júıesine qosyldy.

«2019 jyly syrtqy jaryqtandyrý jelilerin ornatýdy talap etetin jaryǵy joq kóshelerdi anyqtaý boıynsha aýdıt júrgizildi. Nátıjesinde 2 jyldyń ishinde qalany tolyqtaı jaryqtandyrý boıynsha sheshim qabyldandy. Jyl sońyna deıin qala shetindegi 1423 kóshe jaryqtandyrylady. Bul qalanyń Alataý, Jetisý, Naýryzbaı, Túrksib syndy 4 aýdanyn 100% jaryqtandyrýdy qamtamasyz etedi»,–dedi ákim.

2021 jyldyń sońyna deıin qalǵan Almaly, Áýezov, Bostandyq, Medeý aýdandaryndaǵy 601 kósheni jaryqtandyrý josparlanǵan. Osylaısha, Almaty qalasy 100% jaryqtandyrylady.

«Jol ınfraqurylymyn damytý aıasynda «Jańa Almatynyń» yqshamaýdandarynda 42,8 shaqyrym jol salyndy. Uzyndyǵy 192 shaqyrym bolatyn 270 kóshede ortasha jóndeý jumystary aıaqtaldy, 86 shaqyrym trotýar salynyp, jóndeldi. 4 saıabaq jáne 5 jaıaý júrginshi aımaqtaryn abattandyrý qarastyrylǵan»,– dep atap ótti B.Saǵyntaev.

Soynmen qatar, ol bıyl jospardaǵy is-sharalardyń barlyǵy tolyǵymen oryndalǵanyn tilge tıek etti.

Keler jyly shetki aımaqtardy damytý jobasy iske asyrylady, oǵan jalpy somasy 200 mlrd teńgeden astam qarjy bólinedi.