Almatynyń shetki aýdandarynda jańa saıabaqtar ashylady
ALMATY. QazAqparat – Bıyl qalada jańa saıabaqtar paıda bolady, qolda bar skverler abattandyrylyp, sý burqaqtar qalpyna keltiriledi. Bul týraly onlaın brıfıng barysynda Almaty qalasy jasyl ekonomıka basqarmasynyń basshysy Natalıa Lıvınskaıa aıtty, dep habarlaıdy QazAqparat tilshisi.
Basqarma basshysynyń aıtýynsha, Almatyda aýdandardy abattandyrýdyń arqasynda halyq demalatyn jańa oryndar paıda bolady.
«Abaı atyndaǵy opera teatrynyń janyndaǵy skverlerde abattandyrý jumystary bastaldy – qazir granıt basqyshtar men bordıýrler alynyp tastaldy. Olar qurylys jumystary kezinde jaryqshaqtar nemese basqa zaqymdardyń aldyn alý úshin salynǵan. «Suńqar» merdigerlik uıymy plıtkalardyń negizin daıyndaý boıynsha jumystardy júzege asyrady. Sodan keıin granıt plıtkalary qum tóseý arqyly tazartylady. Olar qalpyna keltirilgennen keıin ornyna qaıta salynady», - dedi Natalıa Lıvınskaıa.
Sonymen qatar, ol «Nedelka» sý burqaǵynyń janyndaǵy shamdarǵa demontaj júrgiziletiniń jetkizdi. Almatylyqtardyń súıikti skveriniń tarıhı kelbeti saqtalady.
«Jańa Almaty aýdandarynda jańa saıabaq aımaqtary paıda bolady. Mysaly, «Zerdeli» yqsham aýdanynda, Boraldaı ózeni arnasynyń boıynda, «Ójet» yqsham aýdanyndaǵy toǵannyń boıynda, Alataý aýdany «Kókmaısa» yqsham aýdanynda jańadan qoǵamdyq keńistik qurylady»,-dedi ol.
Natalıa Lıvınskaıa Kishi Almaty jáne Esentaı ózeni arnalaryndaǵy qurylys jumystary týraly aıtty.
«Esentaı ózeni arnasynyń Jamaqaev kóshesinen bastap uzyndyǵy 4,2 shaqyrym sý bólgishke deıingi sý qorǵaý beldeýiniń ýchaskesin qaıta jańartý jalǵasýda. Keıbir ýchaskelerde nóser jańbyrdyń saldarynan gabıondyq qurylystar qulady. Bári qaıta qalpyna keltiriledi», - dedi Jasyl ekonomıka basqarmasynyń basshysy.
