Almatynyń shetki aýdandarynda sport nysandary salynady
ALMATY. QazAqparat - Almatynyń shetki aýdandarynda sport nysandary salynady. Bul týraly onlaın brıfıng barysynda qalalyq Cport basqarmasynyń basshysy Rústem Baıseıitov málim etti, dep habarlaıdy QazAqparat tilshisi.
Onyń aıtýynsha, qazir qalada sport nysandarynyń qurylysy qarqyndy júrip jatyr.
«Sporttyq nysandardyń sany men ornalasqan jerine taldaý jasaý kezinde, olardyń negizgi bóligi qalanyń ortalyǵynda ornalasqanyn kórip otyrmyz. Sondaı-aq osy jerde sporttyq qyzmetter jetkilikti joǵary deńgeıde kórsetiledi. «Jańa Almaty» baǵdarlamasy aıasynda, ásirese, qala shetindegi sport nysandarynyń sanyn arttyrý kózdelýde», - dedi spıker.
Sonymen qatar, ol bıyl birneshe nysannyń qurylysy aıaqtalatynyn aıtty. Máselen Medeý aýdany, Alataý shaǵynaýdanynda 7400 sharshy metrdi quraıtyn dene shynyqtyrý-saýyqtyrý kesheniniń alańy salynyp jatyr. Onda jekpe-jek, sý sport túrleri bolady ári táýligine 894 adamdy qabyldaıdy.
«Sondaı-aq Jetisý aýdany Qazybaeva kóshesinde alańy 7400 sharshy metrdi quraıtyn keshen salynýda. Bul jerde de, sporttyq oıyndar, jekpe-jek, sý sporty túrleri bolady. Táýligine 894 adamdy qabyldaıdy. Jetisý aýdany «Aınabulaq-2» shaǵynaýdanyndaǵy №118 jáne №137 mektepterdiń arasynda alańy 3920 sharshy metr quraıtyn nysannyń qurylysy júrip jatyr. Onda ámbebap jáne trenajer zaly, boks zaly jáne jekpe-jek sporty qamtylady. Táýligine – 564 adamdy qabyldaıdy», - dedi Rústem Baıseıtov.
Bıyl Jetisý aýdanyndaǵy №80 mekteptiń aýmaǵynda 3024, Alataý aýdanynda 3974, Túrksib aýdanyndaǵy «Jas-Qanat» shaǵyn aýdanynda 7400 sharshy metr sport alańy paıdalanýǵa beriledi.
«4 jabyq jáne 10 ashyq korttary bolatyn 14 korttyq tennıs ortalyǵynyń qurylysy júrgizilip jatyr. Ol Alataý aýdany Rysqulov dańǵylynyń soltústiginde, Momyshuly kóshesiniń batysynda ornalasqan. Sondaı-aq atalǵan jobamen fıtnes jáne ońaltý protsedýralaryna arnalǵan zaldar qarastyrylǵan. Bul nysan táýligine 430 adamdy qabyldaıdy», - deıdi basqarma basshysy.
