Almatynyń shetki aýdandarynda birneshe emhana qurylysy bastaldy
ALMATY. QazAqparat - Almatynyń shetki aýdandarynda birneshe emhananyń qurylysy bastaldy. Bul týraly Almatynyń Jaıly qalalyq orta basqarmasynyń basshysy Sapar Nurashev onlaın brıfıngi barysynda aıtty, dep habarlaıdy QazAqparat tilshisi.
«Bıyl balalarǵa shuǵyl medıtsınalyq kómek kórsetý ortalyǵy úshin operatsııalyq blogy bar qabyldaý bólimshesiniń jańa korpýsyn salý jáne «Kemel», «Nurshashqan», «Dýman», «Qarasý», «Saıaly» shaǵyn aýdandarynda jáne Aıbasov kóshesinde ornalasqan otbasylyq-dárigerlik ambýlatorııalar qurylysy josparlanǵan»,-dedi spıker.
Sonymen qatar, ol qazir jylyna 80 myń naýqasty qabyldaıtyn № 7 qalalyq klınıkalyq aýrýhananyń qabyldaý bólmesin japsarlas salý júrgizilip jatqanyn aıtty. Oǵan qosa № 6 qalalyq emhanany jáne aýdanaralyq týberkýlez dıspanserin kúrdeli jóndeý jumystary júrgiziletinin jetkizdi.
«Sondaı-aq, Alataý aýdanynyń «Trýdovık» shaǵynaýdanynda arnaıy turǵylyqty jeri joq tulǵalarǵa arnalǵan jedel áleýmettik kómek pýnktiniń qurylysy bastalady, taǵy №11 qalalyq emhana ǵımaratyn kúrdeli jóndeý jumystary júrip jatyr»,- dedi Sapar Nurashev.
Onyń aıtýynsha, qazir densaýlyq saqtaýǵa erekshe kóńil bólinedi, zamanaýı medıtsınalyq-tehnologııalyq jabdyqtarmen qamtamasyz ete otyryp, halyqqa dárigerlik kómek kórsetý boıynsha belsendi jumys atqarylýda.
«2020 jyly qalada 5 densaýlyq saqtaý nysanynyń qurylysy aıaqtalǵan, bul bir myńnan astam tósek-oryn, atap aıtqanda 280 jáne 300 tósektik modýldi aýrýhanalar, Patologoanatomııalyq bıýro, Degdar kóshesinde ornalasqan 500 tósektik juqpaly aýrýlar aýrýhanasynyń fılıaly, № 4 perzenthana korpýsyna qosymsha qurylys»,- dep tolyqtyrdy ol.
