Almatynyń shetindegi joldardy jóndeý jumystary bastalady
ALMATY. QazAóparat -Almaty ákimi Baqytjan Saǵyntaev BAQ ókilderine arnalǵan onlaın brıfıngte qalaǵa qosylǵan eldi mekenderdi damytý týraly aıtty, dep habarlaıdy QazAqparat tilshisi.
«Alǵabas» yqshamaýdanyndaǵy sýmen jabdyqtaý jáne sý burý jelileriniń qurylysy jalǵasyp jatyr. Qurylys-montaj jumystary aıaqtalǵan soń «Almatyınjstroı» AQ-nyń merdigerlik uıymy Oraqty batyr, Qara jorǵa, Aldııar, Zulpyhar, Sámen batyr, Moldaǵulova, Estemesov jáne Kenjekeı kósheleri boıyndaǵy joldardy ınertti materıaldarmen toltyratyn bolady.
«Alǵabas» yqshamaýdanynda 30,8 km jańa jol salýdyń qujattary daıyn, merdiger kompanııa anyqtalýda. Sýmen jabdyqtaý jáne sý burý jelilerin tartý, sondaı-aq gıdrotestileý jumystary aıaqtalǵannan keıin jol qurylysynyń jumystary bastalady. Jyl sońyna deıin aýdanda 10 shaqyrym jolǵa asfalt tóseý josparda.
«Barlyq kúshter jańa yqshamaýdandardaǵy ınjenerlik ınfraqurylymdy salýǵa jumsalýda.Sýmen jabdyqtaý jáne sý burý jelilerin, joldardy, syrtqy jaryq jelileri, áleýmettik nysandardyń qurylysy ótken jyly qabyldanǵan «Jańa Almaty» keshendi damý baǵdarlamasyna sáıkes júzege asyrylady. Qalaǵa qosylǵan eldi mekender turǵyndarynyń ómir sapasyn bes jyl ishinde jaqsartýǵa trıllıon teńgege jýyq qarjy bólinedi. Bizdiń mindetimiz – 2023 jylǵa qaraı barlyq yqshamaýdandar sýmen jáne káriz jelilerimen, sapaly joldarmen, balalardyń oıyn alańdarymen, saıabaqtar men skverlermen qamtamasyz etilýleri tıis», – dep atap ótti Baqytjan Saǵyntaev.
Megapolıs ákiminiń tapsyrmasy boıynsha arnaıy jumys komıssııasy quryldy, ol qalaǵa qosylǵan jańa yqshamaýdandardyń máselelerin sheshýdi qolǵa alýda. Turǵyndardyń ótinishinen soń jospardan tys tekserý júrgizildi. Tekserý barysynda merdigerdiń jobadan aýytqyǵany, jumysty sapasyz atqarǵany, qurylys-montaj jumystarynyń tehnologııasyn buzǵany anyqtaldy.
Jibergen kemshilikteri úshin «Almatyınjstroı» AQ-nyń merdigeri QR ÁqbK-niń 312-babynyń 1-bóliginiń 309 tarmaǵyna sáıkes ákimshilik jaýapkershilikke tartyldy. Qoldanylǵan sharalardan soń merdiger olqylyqtardyń ornyn toltyrdy. Sonymen birge, «Kazgıprovodhoz ınstıtýty» óndiristik kooperatıviniń jáne «Belko-Stroı» JShS-niń avtorlyq jáne tehnıkalyq qadaǵalaýdy tıisinshe júrgizbegenderi úshin olar da QR ÁqbK-niń 317-babynyń 1-bóliginiń 1 tarmaǵy boıynsha ákimshilik jaýapkershilikke tartyldy.
Búginde merdigerdiń kúshimen Aldııar jáne Jańa kóshelerine jol boıynsha qıyrshyq tas tóseldi. Qazirgi kezde Jańa qurylys kósheleri – 1, 2, 6, Aqseńgir, Babajanov, Kenjekeı, Turan, Oraqty batyr, Kerimsal, Qazyna, Móńke bı, Muhıtdınov, Sultan kóshelerine qıyrshyq tas qospalaryn tógý jumystary júrýde.
