Almatynyń sel basqan aýdandarynan 49 myń tekshe metrden astam qatty turmystyq qaldyqtar men laı shyǵaryldy (FOTO)
ASTANA. QazAqparat - Almaty qalasynyń selden zardap shekken aýdandarynda avarııalyq-qalpyna keltirý jumystaryn júrgizý úshin Qaraǵandy qalasynda ornalasqan QR Ulttyq Ulany Azamattyq qorǵanys polkiniń kúshteri men quraldary kelip jetti.
Bul týraly QR ІІM TJ komıtetiniń Memlekettik til jáne aqparat basqarmasynan habarlady.
Jeke quram jalpy bilim beretin №185 mektep ǵımaratyna ornalastyryldy. Sondaı-aq 146 adam men 16 qutqarý jáne ınjenerlik tehnıka, onyń ishinde avarııalyq-qutqarý, avtogreıder, júk tıegish, tral, sanıtarlyq, vahtovka, júkti ózi aýdarǵysh (samosval), dalalyq ashana avtokólikteri de kelip, búgin selden zardap shekken Alataý aýdanynyń Alǵabas shaǵynaýdanynda seldiń saldaryn joıý jumystaryn bastap ketti.
Sonymen qatar, kesheli beri Almaty oblysynan QR Ulttyq Ulany Azamattyq qorǵanys polki jeke quramynyń qosymsha 130 adamy TJ aımaǵynda tazartý jumystarymen aınalysýda.
Jumyldyrylǵan kúshter men quraldardyń kómegimen Naýryzbaı, Alataý jáne Áýezov aýdandaryndaǵy kósheler men joldardy, úıler men mektepterdi, jertóleler men aýlalardy tazartý jumystary jalǵasyp jatyr. Jalpy qala syrtyna 49000 tekshe metr keletin qatty turmystyq qaldyqtar men selmen kelgen laı shyǵaryldy.
TJ komıteti bólimsheleri kúshteriniń tikeleı qatysýymen Qarǵaly ózeniniń 3 shaqyrym arnasy tazartyldy.
TJK Respýblıkalyq jedel-qutqarý jasaǵy jáne Almaty qalasynyń Qutqarý qyzmetimen qıraǵan aǵashtardan keletin qaýipti joıý jumystary júrgizilip, jalpy 44 tal kesildi.
Qulaqtandyrý avtokóligi arqyly ár saǵat saıyn zardap shekken aýdandardy aralaý, jedel shtabtyń jumysy men «qaýyrt jeli» nómiri, zardap shekken turǵyndardy qabyldaý beketteri men tamaqtandyrý jáne alǵashqy medıtsınalyq kómek kórsetý týraly málimetterdi jetkizý júzege asyrylýda.
Jalpy avarııalyq-qalpyna keltirý jumystaryna 2228 adam men 404 tehnıka jumyldyryldy.
