Almatynyń Saıran kólinde Aýǵanstan azamaty qutqaryldy
ALMATY. QazAqparat – Almatylyq qutqarýshylar «Sý aıdyndaryndaǵy qaýipsiz jaz» naýqanyn jalǵastyrýdy qamtamasyz etýde. Demalys kúnderi Aýǵanstan azamaty sýdan qutqaryldy, dep habarlaıdy QazAqparat tilshisi.
Tótenshe jaǵdaı deparatamentiniń málimetinshe, karantınge qaramastan, ystyq kúni salqyn sýǵa shomylǵysy keletinder sany kúnnen-kúnge kóbeıip keledi. Almatylyq qutqarýshylar sýǵa shomylý erejeleriniń saqtalýy maqsatynda aldyn alý sharalary men reıdter ótkizýde.
Senbi kúni TJ qyzmetkerleri Alataý aýdanyndaǵy iri sýpermarketterde «Qaýipsiz jaz!» naýqanyn uıymdastyrdy. Sýpermarket kassasynyń janynda kelýshilerge saýda jasaǵan túbirtekpen qosa, «Sý qoımalaryndaǵy qaýipsizdik erejeleri» týraly jadynamalar taratyldy.
Sonymen birge, qalanyń barlyq aýdandarynda tótenshe jaǵdaı, polıtsııa, Ulttyq ulannyń patrýlderi jáne volonterler birlesip, demalýǵa ruqsat etilmegen jerlerde sýǵa shomylýdyń aldyn aldy. Jetisý aýdanyndaǵy Esentaı ózeniniń boıynda jáne Kemel shaǵyn aýdanyndaǵy toǵandarǵa júrgizilgen reıd barysynda sýǵa túsýge ruqsat etilmegen jerde eresekterdiń qaraýynsyz shomylyp júrgen jas balalar anyqtaldy. Olarmen profılaktıkalyq áńgimeler ótkizilip, «Іzgi nıet» eriktileri «Sýda abaı bolyńyzdar» atty eskertpelermen tanystyrdy.
Áýezov aýdanynda «109» Qutqarý qyzmetiniń qutqarýshylary motorly 2 qaıyqpen kezekshilikte boldy. Áýezov aýdany TJ bóliminiń qyzmetkerleri JPQB ınspektorymen Saıran kóliniń batys jaǵalaýyn sholý kezinde 34 jáne 35 jastaǵy eki áıel ákimshilik jaýapkershilikke tartyldy. QR Ákimshilik quqyq buzýshylyq týraly kodeksiniń 364-baby 1-bóligine sáıkes «Jalpy sýdy paıdalaný erejelerin buzǵany úshin» ákimshilik hattama toltyryldy.
Jeksenbi kúni Almaly aýdanynda Saıran sý qoımasynyń shyǵys jaǵalaýyna demalýǵa kelgen 18 jastaǵy Dúısesh Marǵulan – jaǵadan 8 metr qashyqtyqta er adamnyń sýǵa batyp bara jatqanyn baıqap qalǵan.
«Tez arada kómekke umtylǵan Marǵulan ony jaǵaǵa súırep shyǵardy.Sýǵa batyp bara jatqan adamdy sý qoımasynda kezekshilikte bolǵan «109» qyzmetiniń qyzmetkeri Qozy Búrkitbaıhan da baıqap, kómekke umtyldy. Jas jigit jaǵaǵa súırep shyǵarǵan adamǵa qutqarýshy tez arada alǵashqy kómek kórsetip úlgerdi. Zardap shegýshi Aýǵanstan Respýblıkasynyń 1977 jyly týǵan azamaty Ahmadı Zaman Mýhammad №7 qalalyq klınıkalyq aýrýhanasyna jetkizildi. Jaǵdaıy turaqty. Ómirine qaýip joq», - dep habarlady TJD-dan.
Osyǵan baılanysty, qutqarýshylar Almaty qalasynyń turǵyndary men qala qonaqtaryna eskertedi:
- «Shomylýǵa tyıym salynady» belgisi bar jerlerde ornatylǵan shekaradan asyp ketpeýdi;
- alkogoldi ishimdik iship jáne esirtkige eltigen kúıinde sýǵa shomylmaýdy;
- balalarǵa eresekterdiń qaraýynsyz sýǵa túspeýdi;
- sý qoımalaryn lastamaýǵa jáne qoqys tastamaýdy, kir jýmaýdy, janarmaı quımaýdy, sýǵa shomylýǵa arnaıy ruqsat etilgen jerlerde jáne olarǵa jaqyn ornalasqan aýmaqtarda, onyń ishinde jaǵajaıdan 500 metrge deıin qashyqtyqta kólikti jýmaýdy jáne jóndemeýdi.
