Almatynyń saılaý ýchaskelerinde jaǵdaı turaqty - baıqaýshylar shtaby

ALMATY. QazAqparat – Jalpyqalalyq baspasóz ortalyǵynda ótken brıfıng barysynda Almaty qalasynyń aýmaqtyq kásipodaqtar birlestiginiń baıqaýshylar shtaby QR Parlamenti Májilisi men barlyq deńgeıdegi máslıhat depýtattarynyń kezekti saılaýyndaǵy óz baıqaýshylarynyń jumysy týraly aıtyp berdi, dep habarlaıdy QazAqparat tilshisi.

Almaty qalasy kásipodaqtarynyń aýmaqtyq birlestigi baıqaýshylar shtabynyń jetekshisi Serikjan Baıǵuttınov saılaý ýchaskelerindegi aǵymdaǵy jaǵdaıǵa túsinikteme berdi.

«Qazirgi tańda jaǵdaı turaqty. Saılaýshylar daýys berý protsesine belsendi qatysýda. Onyń barysynda zańbuzýshylyqtar baıqalmaıdy. Sanıtarlyq normalar saqtaldy. Kireberiste dezınfektsııadan ótýge bolady, dárigerler saılaýshylardyń temperatýrasyn tekserip otyr. Belgiler men bólinister bar», - dep atap ótti ol.

Shtab múshesi Gúlnar Taýanova saılaý ýchaskelerindegi jumysqa toqtaldy.

«Men Túrksib aýdany boıynsha úılestirýshimin. 58 ýchaskede jumys isteımiz, onda eki aýysymǵa bólingen 116 baıqaýshy bar. Biz únemi olarmen baılanysyp otyramyz. Ár saǵat saıyn esep beredi. Ýchaskede tańǵy saǵat 6-dan bastap jumys istep jatyrmyz»,-dedi ol.