Almatynyń saýda, oıyn-saýyq ortalyqtarynda 55 adam vaktsınalandy
ALMATY. QazAqparat - Búgin saǵat 10.00-den bastap Almatydaǵy saýda,oıyn-saýyq ortalyqtary men bazarlarda koronavırýsqa qarsy vaktsına salý pýnkteri jumys isteı bastady, dep habarlaıdy QazAqparat.
Búgin «Máskeý» saýda, oıyn-saýyq ortalyǵy jumys istemese de, egý pýnkti qyzmetin bastady. Kúzet qyzmetindegiler ǵımaratqa tek vaktsınatsııaǵa aldyn ala jazylǵandar men shaqyrylǵandardy kirgizedi. Ol úshin qaýipsizdik qyzmetiniń qyzmetkerine eskertý jetkilikti.
«Máskeý» SOSO egý pýnktiniń jaýapty kezekshisi Gúldana Tóleshova atap ótkendeı, medıtsına qyzmetkerleri saǵat 10.00-den bastap, saǵat 20.00-ge deıin almatylyqtarǵa ekpe júrgizýdi jalǵastyrady. Dárigerler Almaty qalasynyń № 16 emhanasyna tirkelgen azamattarǵa aldyn ala qońyraý shaldy. Sondaı-aq E-gov arqyly vaktsınatsııa alýǵa jazylǵandar da bar. Tórt saǵat ishinde dárigerler 50-ge jýyq adamǵa ekpe saldy, vaktsınatsııa qyzý júrip jatyr.
Koronavırýstan ekpe alǵan eń jas adam 18-de bolsa, jasy eń úlkeni – 87-degi qart.
«Egý pýnktinde 2 terapevt dáriger men medbıkeler jumys isteıdi. Adam sany kóp emes, betperde rejımi, áleýmettik qashyqtyq saqtalǵan, kezegin kútýshiler bir-birinen alshaq otyrǵyzylady. Barlyǵy aldyn ala tirkeýden, sodan keıin dárigerdiń qaraýynan ótedi, sodan keıin qarsy kórsetilimder bolmasa, patsıentti emshara kabınetine jiberemiz», - dep túsindirdi Gúldana Tóleshova.
Aıta keteıik, almatylyqtar vaktsınatsııaǵa sanaly túrde, óz erkimen jazylyp, emhanalarda, SOSO bazasynda ornalasqan pýnkterge kelýde.
Almatyda koronavırýsqa qarsy egý pýnkteri qaı jerlerde ornalasqany týraly buǵan deıin jazǵan bolatynbyz.
