Almatynyń Rysqulov-Qulja tasjolyndaǵy jolaıyryq qashan ashylady
ALMATY. QazAqparat - Almatyda Rysqulov pen Qulja avtojolynyń qıylysyndaǵy jolaıyryq 1 shildede paıdalanýǵa beriledi. Qurylys jumystary tolyǵymen jeltoqsan aıynda aıaqtalady, dep habarlaıdy QazAqparat tilshisi.
Bul týraly Facebook-te qala ákiminiń orynbasary Erlan Áýkenov jazdy.
«Almatyda qozǵalys eń kóp joldardyń biri - Shyǵys aınalma joly. Bul jol áýejaı men qalanyń ortalyǵyn qosyp tur. Bir táýlikte Qulja avtojoly arqyly 40 myń kólik (Polıtsııa departamentiniń málimetinshe) qalaǵa kiredi. Júrgizýshilerdiń tarapynan kepteliske qatysty shaǵym kóp túsedi. Qulja tasjoly men Rysqulov dańǵyly arasyndaǵy jolaıyryq 1 shildede ashylady, al qurylys jumystary jeltoqsan aıynda tolyǵymen aıaqtalady», - dedi qala ákiminiń orynbasary.
Onyń aıtýynsha, kólik toraby paıdalanýǵa berilgen jaǵdaıda qozǵalys múmkindigi Rysqulov dańǵylynda - 10% (táýligine ótetin kólik sany 5,5 myńnan kóp), Qulja tasjolynda 15% (táýligine ótetin kólik sany 6,6 myńǵa) artady. Sonymen qatar Túrksib, Jetisý, Medeý aýdandarynyń 250 myń turǵyny úshin jol qozǵalysy jeńildeı túspek.
Búginde qalanyń 8 iri kólik nysanynda qurylys jumystary júrip jatyr.
Odan bólek, bıyl Qulja tasjoly men Buqtyrma kóshesiniń qıylysynda estakada men týnneli bar jolaıyryqtyń qurylysy bastalady. Qazir kólikter úlken aınalma jolymen aınalyp ótip jatyr. Jolaıyryqtyń qurylysy 2020 aqpanda aıaqtalady. Bul jumystar qalanyń ekologııalyq máselelerin sheshýge baǵyttalǵan», - dep jazdy ákim.
