Almatynyń provızorlyq emhanadasyndaǵy 222 adamnan koronavırýs tabylǵan joq
ALMATY. QazAqparat – Almaty qalalyq Qoǵamdyq densaýlyqty saqtaý basqarmasy provızorlyq statsıonarda jatqan adamdardyń densaýlyǵy jaıly aıtty, dep habarlaıdy QazAqparat tilshisi.
«Búginde Shuǵyl jedel kómek kórsetý aýrýhanasynda (provızorlyq emhana) 222 adam jatyr. Bul juqtyrǵan adamdarmen baılanysta bolǵan adamdar. Ázirge olardyń barlyǵynyń taldaýy koronavırýs joqtyǵyn kórsetip otyr. Bul ortalyqqa adamdardy ushaqtardan túsirip alyp kirgizgen. Munda basym kópshiligi Qazaqstan azamattary, AQSh, Belgııa, Túrkııa, Aýǵanstan, Reseı, Tájikstan, Ózbekstan azamattary da bar. Kópshiligi er adamdar, arasynda áıelder, balalar, júkti áıelder de bar», - dedi aýrýhananyń bas dárigeri Saǵı Beısenbekov.
Olardyń densaýlyǵyn 314 qyzmetker baqylap jatyr.
Almatyda qalýǵa nıet bildirgen qyzmetkerlerge Qyzdar pedagoıkıalyq ýnıversıteti 200 oryndyq jataqhanasyn usyndy.
«Aýrýhanada jatqan adamdar deni saý adamdar. Biraq taldaý nátıjesin qobaljýmen kútedi. Olardyń barlyǵyn tynyshtandyryp, sózben jubatýǵa týra keledi. Qazir medıtsına salasy buryn sońdy bolmaǵan syn saǵatty basynan keshirip jatyr. Bizge táýlik boıy jumys jasaýǵa týra kelip jatyr. Tańnan keshke deıin obaǵa qarsy kostıým kııýge týra keledi. Óte yńǵaısyz ekeni ras», - dedi aýrýhananyń bas dárigeriniń orynbasary Maǵaz Muqashev.
Al bul aýrýhanada munyń aldynda túsken naýqastardyń barlyǵy qaladaǵy basqa aýrýhanalardyń statsıonarlaryna taratylyp jatqyzyldy.
