Almatynyń polıtseıleri kezekti «telefondyq lańkesti» ustady
ASTANA. 19 qyrkúıek. QazAqparat /Gúlmıra Alıakparova/ - Almaty qalasynyń polıtseıleri «telefondyq lańkesten» qalanyń qonaq úıleriniń birine jarylǵysh zat qoıylǵandyǵy týraly taǵy bir habar aldy. Bul týraly Almaty qalasynyń Іshki ister departamentinen habarlady.
Jarylǵysh zattyń qoıylýyna qatysty buǵan deıingi faktilerge uqsatyp, 24 jastaǵy almatylyq óziniń «qaljyńynyń» nysany retinde «Aqsaı» shaǵyn aýdanynda ornalasqan kishigirim qonaq úıdi alǵan. Aqparat túńgi saǵat eki jarym shamasynda tústi.
Almaty qalalyq ІІD Basqarmasynyń bastyǵy, podpolkovnık Erlan Oralbekovtyń aıtýynsha, qonaq úıge jarylǵysh zat qoıylǵandyǵy týraly habar TJD-nyń kezekshi bólimine, TJD-dan ІІD-niń Shuǵyl basqarý ortalyǵyna jetkizildi. Qaýipti habar uıaly telefonnan túskeni birden anyqtalyp, telefon shalýshynyń tulǵasy men onyń aqparatynyń rastyǵyn anyqtaý úshin birqatar shuǵyl-izdestirý sharalary ázirlendi.
15 bólmesi bar shaǵyn qonaq úıge dereý jetken qutqarýshylar ǵımarattan qonaqtar men qyzmet etýshilerdi, barlyǵy 25 adamdy syrtqa shyǵaryp, 1 jarym saǵat boıy tintý júrgizdi. Ǵımarat aýmaǵy qorshalyp, kólikter alys jerge qoıyldy. bul jumystarmen barlyǵy 30 polıtseı men 15 qyzmettik kólik aınalysty.
Málim etilgendeı, anonım bir saǵattan keıin óz páterinen ustaldy. Ustaý barysynda «ázilkesh» qatty tańyrqaǵan, sebebi ózin quqyq saqshylary taba almaıtynyna senimdi bolǵan.
Anyqtalǵandaı, Ravıl óziniń bul qareketi jasyryn qalý úshin aldyn ala jiti daıyndalǵan. Ol jeke basty káýlandyratyn qujatty talap etpeıtin satýshydan arzan abonenttik nómir satyp alǵannan keıin, qala syrtyna shyǵyp, jarylǵysh zat týraly habarlaǵan.
Tergeý barysynda bul qylmys arqyly qandaı da bir maqsatty kózdemegenin, ony tek oıyn úshin jasaǵanyn aıtty.
«Qylmystyq isti tergeý barysynda qalalyq psıho-nevrologııalyq dıspanserdiń dárigerlerimen habarlasyp, ustalǵan azamattyń arnaıy esepte turǵan-turmaǵandyǵyn anyqtaıtyn bolamyz», - dep atap ótti E.Oralbek.
