Almatynyń perzenthanasyndaǵy órt kezinde 8 sábıdi qutqarǵan qyzmetkerler marapattaldy
ALMATY. QazAqparat – Almatyda perzenthanadan shyqqan órtti sóndirýge atsalysqan dárigerler men meıirbıke marapattaldy, dep habarlaıdy QazAqparat tilshisi.
QR Іshki ister mınıstri Erlan Turǵymbaevtyń buıryǵymen, balalardyń ómirin qutqarýdaǵy erligi, batyldyǵy men qaısarlyǵy úshin almatylyq akýsher-dáriger Perızat Sadyqova, meıirbıke Araılym Jıdelıeva jáne akýsher-dáriger Vıtalıı Grýshevskıı «Órt kezinde kórsetken qaısarlyǵy úshin» medalimen marapattaldy.
«Qazaqstan Respýblıkasy Іshki ister mınıstriniń tapsyrmasy boıynsha adam ómirin saqtap qalǵandary úshin barlyq marapat ıelerine alǵys aıtamyn! Marapattalǵandardyń arasynda indet tarap jatqan kezde naýqastarǵa medıtsınalyq kómek kórsetip qana qoımaı, adamdardy qaýipten aman alyp qalǵan dárigerler de bar. Kez kelgen ýaqytta qol ushyn sozyp, kómekke kelýge daıyn azamattarymyzǵa aıtar alǵysymyz sheksiz. Jaýapkershilik pen tabandylyq, batyldyq jáne jedel sheshim qabyldaı bilý qabileti - bizdiń urpaǵymyzdyń boıynda bolýy kerek qasıetter», - dep atap ótti Almaty qalalyq Tótenshe jaǵdaılar departamentiniń bastyǵy Serik Áýbákirov.
Eske salaıyq, osy jyldyń 18 shildesinde Almaty qalasyndaǵy №1 perzenthananyń balalar reanımatsııasy bóliminen órt shyqty. Onda jańa týǵan 8 sábı boldy. Dabyl qaǵylǵan kezde, sol túngi kezekshilik top tez arada tótenshe jaǵdaılar kezindegi áreketter algorıtmine sáıkes senimdi jáne dúrbeleńsiz jumystar atqardy. Reanımatsııa bólimshesindegi 8 jańa týǵan sábıdi akýsher-gınekolog Perızat Sadyqova jáne balalar meıirbıkesi Araılym Jıdelıeva qaýipsiz jerge kóshirdi. Dárigerlerdiń biri Vıtalıı Grýshevskıı elektr symdarynyń tuıyqtalýyna jol bermeı, untaqty órt sóndirgishti tez arada qoldanyp úlgerdi.
