Almatynyń patrýl polıtseıleri ádeptilik negizderin úırenip jatyr
ALMATY. QazAqparat – Patrýl polıtsııasy qyzmetkerleriniń etıkasy men saýatyn kóterý úshin Almatydaǵy QR ІІM akademııasy men QR ІІM oqý ortalyǵy kýrs uıymdastyryp otyr, dep habarlaıdy QazAqparat.
«Qyzmetkerlerge jyly qarym-qatynas jasaý jáne etıkany saqtaý, ıdeologııalyq saýattylyqty arttyrý taqyrybynda lektsııa oqyldy. Oqytý trenıngine Jol-patrýl polıtsııa polkinen jáne mamandandyrylǵan ákimshilik polıtsııa batalonynan 700-den astam qyzmetker qatysty. Patrýl polıtseıleri kún saıyn qala turǵyndarymen aralasyp-quralasayp, qarym-qatynas jasaıdy, azamattar arasyndaǵy polıtsııa bedeli sol arqyly qalyptasady. Sondyqtan halyqpen dóreki sóılesip, ádepsiz qylyq kórsetýge jol berilmeıdi. Qyzmettik etıkany saqtaý, ár adamǵa ádeppen jáne iltıpatpen jaýap berý – bul jumystaǵy eń basty talap», - deıdi qalalyq polıtsııa departamenti bastyǵynyń orynbasary Erjan Orazbekov.
Lektorlar óz kezeginde polıtsııanyń halyqpen qarym-qatynasynda verbaldyq emes qatynas quraldary (ym-ıshara, psıhologııalyq qashyqtyq) mańyzdy ról oınaıtynyn aıtady. Ol ısharalar kóp málimet bere alady. Oqytýshylar, sonymen qatar, aldyńdaǵy adam ózin jaısyz sezinbes úshin belgili bir qashyqtyqty saqtap, shekten shyqpaý kerektigin eske salady. Sebebi bul faktor ári qaraıǵy áńgimeniń tıimdiligine tikeleı áser etedi.
