Almatynyń patrýldik polıtsııasy eki aýysymdaǵy jumys tártibine kóshirildi
ALMATY. Tamyzdyń 9-y. QazAqparat - «Quqyq tártibi» arnaıy is-sharasy aıasynda qalamyzdaǵy patrýldik polıtsııa qyzmeti eki aýysymdaǵy jumys tártibine kóshirildi. Bul degenimiz patrýldik jasaqtardyń kóbeıýimen qatar, qamtamasyz etiletin aýmaqtardy keń kólemde tekserýge múmkindik týǵyzyp otyr. Atap óter bolsaq kúndelikti qoǵamdyq tártipti qamtamasyz etýge patrýldik polıtsııanyń 400-den asa qyzmetkerleri men 113 patrýldik kólik, sonyń ishinde 7 jyljymaly «Granıt» pýnkti jáne túngi «Mıraj» izdestirý toptary jumyldyrylady, dep habarlaıdy qalalyq ІІD baspasóz qyzmeti.
«Aıta ketetin bolsaq, ashylǵan qylmystardyń basym kópshiliginde patrýldik polıtsııa saqshylarynyń qosqan úlesteri orasan zor. Qylmys oryn alǵan jerge birinshi kelip jetip, alǵashqy izdestirý sharalaryn uıymdastyrý, kóshe boıynda jasalatyn qylmystardyń aldyn alý olardyń basty mindetteri bolyp tabylady. Mysalǵa, ótken táýlik ishinde qalamyzda 30 qylmys tirkelip, 29 izi sýymaı ashylǵan qylmystyń 11-i «Boran» patrýl saqshylarynyń úlesinde», - dep atap kórsetti Almaty qalasy ІІD patrýldik polıtsııa polkiniń komandıri Serik Kenenbaev.
Dálirek aıtqanda, jaqynda oryn alǵan qaraqshylyq shabýyldy patrýldik polıtseıler ashqan. Іshimdikke sylqııa toıyp alǵan tórteý, kóshe boıynda ketip bara jatqan azamatty pyshaqpen qorqytyp, odan qol saǵaty men aqshasyn tartyp alǵan. Patrýldik polıtsııanyń úsh ekıpajy qylmys jasalǵany týraly málimetti alysymen, dereý izdestirý sharalaryna kirisken. Nátıjesinde barlyq qylmystyq top músheleri tutqyndaldy.
«Sonymen qatar, olar óz jumystaryn atqarý ýaqytynda, adamdar kóp jınalatyn oryndardy erekshe nazarda ustaıdy. Qoǵamdyq tártipti buzǵandar nemese kúdik týǵyzǵan azamattardy jeke basyn anyqtaý úshin aımaqtyq ishki ister organdaryna jetkizedi. Qazirgi tańda patrýldi polıtsııa saqshylarynyń jumysyna halyq oń kózben qarap, múmkindiginshe qoldaý kórsetip, túrli alǵys hattar joldaǵandary bizderdi qýantyp otyrǵanyn aıta ketken jón. Búgingi tańda patrýldik polıtsııa qyzmetkerleri ishki ister organdarynyń betke ustar saqshylaryna aınalyp otyr. Aldaǵy ýaqytta halyq arasynda polıtsııa týraly oń pikirler qalyptastyrý úshin túrli jumystar atqarylatyn bolady», - dep óz sózin túıindedi Serik Kenenbaev.
