Almatynyń ortasynda sýsyz otyrǵan 15 otbasynyń máselesi sheshildi
ALMATY. QazAqparat – Almaty qalasynyń ortalyǵynda tursa da órkenıet ıgiliginen qaǵylǵan 15 otbasynyń muńyn tyńdaýǵa búgin Jetisý aýdanynyń ákimi Maqsat Qıqymov keldi, dep habarlaıdy QazAqparat tilshisi.
Bul týraly ákim Instagram-daǵy paraqshasynda jazdy.
«Almaty qalasy ákiminiń @sagintayev.b tapsyrmasyna sáıkes Baıshev kóshesiniń turǵyndarymen kezdestim. 14 úıdiń turǵyndarynan shaǵym tústi. Turǵyndar «Baıshev kóshesindegi sý qubyry jelilerin jóndeý» jobasynan tys qalǵan. Al tapsyrys berýshi «Almaty sý» jáne merdiger «Kolsaı Stroı» JShS kósheniń bir bóligi «Almaty sý» balansynda joq bolǵandyqtan, olardy jobaǵa engizbegen. Qazirgi sý qubyry 1960 jyly salynǵan jáne apatty jaǵdaıda. Osyǵan baılanysty uzyndyǵy 350 metr bolatyn 14 úıdiń turǵyndaryna sý qubyryn ótkizý týraly sheshim qabyldandy. Qurylys-montaj jumystary bıyl 10 tamyzda bastalady. Jumys 31 tamyzǵa deıin aıaqtalýy tıis», - dedi Maqsat Qıqymov.
Aıta ketý kerek, Baıshev kóshesiniń tuıyqtalǵan bóligindegi 15 úıdiń turǵyndary BAQ ókilderin shaqyryp, shaǵym aıtqan bolatyn.
Turǵyndar 5 jyldan beri barlyq ınstantsııalardyń tabaldyryǵyn tozdyryp sharshaǵan.
130 metrge sozylǵan kóshede sý qubyry apatty jaǵdaıda, asfalt tóselmegen.
