Almatynyń ortasynda avtokólik aýdarylyp, jolaýshy zardap shekti
ALMATY. QazAqparat - Almatyda Rozybakıev kóshesinde kólik aýdarylyp, saldarynan kólik jolaýshysy zardap shekti. Apat saldarynan qatty keptelis paıda boldy. Oqıǵa ornynan túsirilgen vıdeo jelide tarady, dep habarlaıdy QazAqparat.
«Rozybakıev-Levıtan kósheleriniń qıylysynda kólik aýdarylyp, qatty keptelis boldy. Baǵyttaryńyzdy aldyn ala josparlańyzdar» delingen habarlamada.
Polıtsııa departamentiniń baspasóz qyzmeti apat 8 aqpanda bolǵanyn aıtty.
«Lifan» markaly avtokóliginiń júrgizýshisi Rozybakıev kóshesiniń boıymen ońtústik baǵytta, Levıtan kóshesiniń qıylysynda sol jaq burylysty jasap, Rozybakıev kóshesiniń boıymen soltústik baǵytta kele jatqan «Volkswagen Transporter» markaly avtokóligimen soqtyǵysqan.
Osy jol apaty saldarynan «Lifan» kóligi aýdarylyp, atalǵan kólik quralynyń jolaýshysy zardap shekti.
«Atalǵan fakti QR QK 345-babynyń 2-bóligi boıynsha tirkeldi. Tıisti saraptamalar taǵaıyndaldy», - deıdi Almaty qalasy JKO anyqtaý basqarmasynyń bastyǵy, polıtsııa maıory Oljas Sháripov.
