Almatynyń Ortalyq saıabaǵyna Batyrhan Shúkenovtiń músini qoıylady
ALMATY. QazAqparat - Almaty ákimi Baýyrjan Baıbek jumys sapary kezinde jańarǵan Ortalyq mádenıet jáne demalys saıabaǵyn aralap kórdi, dep habarlaıdy QazAqparat tilshisi.
Buǵan deıin jańa fontandar, balalar men sport alańdaryn salýǵa «Rýhanı jańǵyrý» baǵdarlamasy aıasynda 1,6 mlrd teńge jeke qarjy ınvestıtsııalanǵan edi.
Ortalyq saıabaq dırektory Vladımır Kalının óziniń sózinde jaryq dińgekteriniń qoıylyp, asfalt tóselgenin, trotýarlar plıtkalarynyń jańarǵanyn, zamanaýı navıgatsııanyń ornatylǵanyn aıtty. Buryn kólik turaǵy bolǵan saıabaqtyń naq tórine sport alańdary, strıt-vorkaýt, basketbol jáne fýtbol alańdary, rollerdrom, zamanaýı betondy skeıt park ornalasqan. Jazǵy sahna mańynda jańa sýburqaq, 10 jyl boıy jumys istemegen, qaıta jańarǵan fontan bar.
«Dástúrdi qurmetteı otyryp, rekonstrýktsııalaý kezinde biz «Tengrıan kúntizbesin» beıneleıtin keshendi músin jasaý týraly sheshim qabyldadyq. Al bul Ortalyq Azııanyń kóshpeli elderiniń 12 jyldyq «shyǵys kúntizbesin» kórsetedi. Osy rette biz tarıhshylarmen, sarapshylarmen keńestik, olardyń arasynda belgili ónertanýshy doktor, professor Ásııa Ibadýllaqyzy Muhambetova bar. Menińshe, bul jer bolashaqta saıabaqtyń naǵyz kórnekti ornyna aınalady dep oılaımyn», - dedi Vladımır Kalının.
Bıyldyń ózinde munda taǵy da qosymsha jańa balalar qalashyǵy, múmkindigi shekteýli jandar úshin sport alańy jáne «Mýzyka baǵy» paıda bolady. Dál osy jerge Baýyrjan Baıbektiń usynysy boıynsha Qazaqstannyń eńbek sińirgen óner qaıratkeri Batyrhan Shúkenovtyń músini qoıylady.
Baýyrjan Baıbek «Visit Almaty» jańa týrıstik aqparattyq ortalyǵynda boldy. Ol Voznesensk kafedraldy soborynyń eskerýsiz qalǵan, keıin jańarǵan keshenine ornalasqan, sonymen qatar sonaý 90-shy jyldardan beri jumys istemeı turǵan velotrektiń sport keshenin jańartý jumysynyń barysyn tekserdi. Qala ákimi trotýarlardy, onyń ishinde Ortalyq saıabaqqa aparatyn Gogol kóshesin abattandyrýǵa erekshe nazar aýdardy.
Aıta keterligi, búgin Almaty ákimine birqatar qala turǵyndary Elbasynyń Memleket basshysy retindegi ókilettigin toqtatý týraly sheshimin quptamaıtyndyqtaryn bildirip jatty.
«Prezıdenttiń otstavkaǵa ketýin men óte aýyr qabyldadym», - dedi Almatyda turǵyny.
Óz kezeginde Baýyrjan Baıbek Nursultan Nazarbaevtyń qashanda halyqpen birge ekenin jáne qazaqstandyqtar úshin Elbasy ekenin aıtty.
«Jyly sózderińiz úshin Sizge kóp rahmet. Elbasy halqymyz úshin orasan isterdi atqardy, ol eshqaıda ketpeıdi, «Nur Otan» partııasynyń tóraǵasy, Qaýipsizdik Keńesiniń basshysy, ultymyzdyń Elbasy retinde ol bizben birge. Elbasy júrgizgen memlekettik syndarly saıasat odan ári jalǵasady, onyń ishinde etnıkaaralyq jáne konfessııaaralyq kelisim, qoǵamda beıbitshilikti saqtaý syndy qundy modelder jańǵyra túsedi. Men osy jańa ǵana 28 gvardııashylar-panfılovshylar saıabaǵynda boldym. Qazir ol jerde Almaty tarıhyn aıshyqtaı túsetin Voznesensk kafedraldy sobory jáne qalanyń birqatar nysandary rekonstrýktsııalanýda», - dedi qala ákimi.
