Almatynyń Ortalyq saıabaǵy qalaı ózgeredi
ALMATY.QazAqparat -Almaty ákimi Baýyrjan Baıbek Ortalyq mádenıet jáne demalys saıabaǵyndaǵy jóndeý jumystarynyń jaǵdaıyn tekserdi, dep habarlaıdy QazAqparat tilshisi ákimdiktiń baspasóz qyzmetine silteme jasap.
Saıabaqtyń basqarýshy kompanııasy jańa sýburqaqtar, balalar men sport alańdaryn salyp jatyr. Qalany rekonstrýktsııalaýǵa bılik qoldaý kórsetip otyr. Al jeke qarjydan jalpy mólsheri 1,6 mlrd. teńge ınvestıtsııa tartyldy. Sondaı-aq quziretti kompanııa jańa jáne zamanaýı attraktsıondar satyp alýdy josparlap otyr.
«Ortalyq mádenıet jáne demalys saıabaǵy aınalasyna jańadan 182 jaryq dińgekteri ornatyldy. Jaıaý júrginshilerge arnalǵan joldarǵa kafel tóselip, jasyl aımaq keńeıtilgen. Saıabaq aýmaǵy birneshe taqyryptyq aımaqtarǵa bólingen. Saıabaq ortalyǵyndaǵy burynǵy avtoturaq qazir skeıtodrom men rollerdrom, strıt-vorkaýt, tennıs korty, basketbol jáne balalar alańyna aınaldy»,-dep málimdedi ákimdiktiń baspasóz qyzmeti.
Qazir saıabaqta burynǵy sýburqaqtardy qalpyna keltirý jáne jańasyn ornatý jumystary júrip jatyr. Jazǵy sahnanyń shyǵys jaǵyna eýropalyq qondyrǵylardy qoldana otyryp qurǵaq sýburqaq salynyp jatyr.
Ákimdiktiń málimetinshe, negizgi jumystar bıyl qazan aıyna deıin aıaqtalady.
