Almatynyń ortalyq kósheleri ýaqytsha jabylady
ALMATY. QazAqparat – Medeý aýdanynda jol jóndeý jumystaryna baılanysty birneshe kóshe jabylady, dep habarlaıdy QazAqparat tilshisi.
Medeý aýdany ákimdiginiń málimetinshe, jol jóndeý jumystaryna baılanysty 25 qyrkúıekte saǵat 17:00-den 26 qyrkúıek saǵat 23:00-ge deıin Raıymbek – Nazarbaev dańǵylynan Jangeldın kóshesine deıin, Pýshkın kóshesinen Maqataevtan Raıymbek dańǵylyna deıin, Ýálıhanov kóshesi boıymen Raıymbek dańǵylyna deıin, Qonaev kóshesinen Maqataev kóshesine deıin qozǵalys shekteledi.
«Sonymen qatar, 203, 204, 207, 208, 220, 221, 222, 225, 228, 410 avtobýstarynyń qozǵalysy ózgeredi: Raıymbek dańǵyly boıynsha – Nazarbaev dańǵyly men Pýshkın kóshesiniń arasyndaǵy barlyq qoǵamdyq kólik shyǵys baǵytta jolaıyryqtyń tonnel bóligi arqyly ótetin bolady. Talǵar, Esik qalalary men Ótegen Batyr kentiniń mańyndaǵy jolaýshylar úshin Raıymbek-Nazarbaev dańǵyly, Raıymbek-Jangeldın, Pýshkın-Maqataev, Gogol-Nazarbaev dańǵyly sońǵy aıaldama bolady», – delingen habarlamada.
