Almatynyń ortalyq kósheleri qalaı ózgerdi
2018 jyldyń jazy ortalyq kóshelerdiń shańyn kótergen jóndeý jumystarymen almatylyqtardyń esinde qalatyny anyq.
Byltyr qala bıligi Panfılov, Jibek joly, Gogol, Qabanbaı batyr, Tólebaev, Baıseıitova kósheleri men «Astana» alańyn jańartsa, bıyl Abaı, Abylaı han, Dostyq, Nazarbaev, Jeltoqsan kósheleri jáne «Almaty 2» vokzal alańy men Respýblıka saraıynyń aldy qaıta jóndeýden ótti. 
800 shaqyrymǵa jýyq ınjenerlik jeliler qaıta salynyp, 300 shaqyrymdaı aryq jóndeldi.
Rekonstrýktsııadan keıingi kósheler kóz tartady. Jaıaý joldarda asfalt ornyna plıtkalar tóselip, Almaty ortalyǵy evropalyq keıipke engen. Abaı dańǵylyndaǵy basty aryq jóndelip, ústine biryńǵaı stıldegi kópirler ornatylǵan. Jol jıegine tóselgen gúlzarlar kóshe kórkin qyzdyra túsken. 
«Adamdarǵa jaıly qala» jobasy aıasynda 2 jyl ishinde tarıhı ortalyqtyń 60 paıyzy keshendi túrde jańardy. Abattandyrý kezinde jańa tehnologııalar men zamanaýı materıaldar qoldanyldy. Energııa únemdeıtin shamdar ornatyldy. Qaladaǵy jaryqshamdardyń 30 paıyzy jaryqdıodty sham túrimen almastyryldy. Jaıaýjoldar men jasyl aımaqtar keńeıtildi»,-dep málim etti Almaty ákimdiginiń baspasóz qyzmeti.
Qala ákimdiginiń málimetinshe, búginde qalada 500 shaqyrymǵa sozylatyn 524 kóshe jóndelgen. Barlyq jerasty ótkeliniń jóndeý jumystary bitýge jaqyn. Úlken úsh kólik aınalmasynyń qurylysy bastalyp jatyr. Kópirler salynyp, tramvaı joldary joıylǵan.
Budan ózge, qalada jańa beınebaqylaý kameralary ornatylǵan.
«Qalaǵa 118 myńnan astam kamera qoıyldy. Barlyq jer asty ótkeli beıne baqylaýda. Keler jyly adamdar kóp jınalatyn jerlerge, mektepter men balabaqshalarǵa 1000 taldaý kamerasy ornatylady. Beıneanalıtka kamerasyn basqaratyn biryńǵaı ortalyq qurylady»,-dedi baspasóz qyzmeti.
Eske sala ketsek, búgin Elbasy Almatynyń jańa kóshelerin aralady.
