Almatynyń ortalyǵynda zańsyz salynǵan kólik jýý nysany súrildi

ALMATY. QazAqparat - Almaty ortalyǵyndaǵy birneneshe kommertsııalyq nysan buzyldy. Bul týraly qala qurylysyn baqylaý basqarmasy málim etti, dep habarlaıdy QazAqparat tilshisi.

Sot sheshimimen Qarasaı batyr men Áıtıev kóshesiniń qıylysynda ornalasqan kólik jýý orny men birqatar kommertsııalyq nysan súrildi.

«Tekserý kezinde nysan zańsyz salynǵany anyqtaldy. Biz birden sotqa talap-aryz berdik. Almaty qalalyq sotynyń sheshimi boıynsha talap aryzdar tolyǵymen qanaǵattandyryldy», - dep habarlady basqarmadan.

Basqarma málimetinshe, nysandy paıdalanýǵa qabyldaý aktisin sot jaramsyz dep tanyp, onyń Almaty qalalyq Ádilet departamentindegi tirkeýiniń kúshin joıǵan.

Qańtar aıynda sot oryndaýshylarymen birge nysandy buzý bastalyp, búginde jumys tolyǵymen aıaqtaldy.