Almatynyń ortalyǵynda 4 qabatty úıler 20 paıyzdan aspaýy kerek - ákimdik
ALMATY. QazAqparat – Almatynyń ortalyq bóliginiń qurylysyna arnaıy talaptar qoıylatyn boldy. Bul týraly búgin onlaın brıfıng barysynda Almaty qalasy qalalyq Josparlaý jáne ýrbanıstıka basqarmasynyń basshysy Almashan Ahmedjanov aıtty, dep habarlaıdy QazAqparat tilshisi.
Basqarma basshysy «Almaty - shetsiz qala» tujyrymdamasyn iske asyrý týraly baıandady.
Onyń aıtýynsha, qalada biryńǵaı dızaın kodtan bólek ortalyq bóligin salýdyń standarttary bar.
«Dızaın kod ta standart bolyp tabylady. Biraq, odan bólek halyqaralyq tájirıbede bekitilgen bıik ǵımarattardy salý reglamenti de bar. Bizde ál-Farabı dańǵylynda úıdiń bıiktigi 12 metrden aspasyn degen talap bar. Ortalyqta osy talaptar saqtalady. Óıtkeni turǵyndar ishinde kelispeýshiliktiń barlyǵy osy bıik ǵımarattardan týyp otyr. Qazir 6-12 etaj aralyǵyndaǵy ǵımarat salý boıynsha arnaıy talaptar jasalyp jatyr. Máselen, ortalyqta 4 qabatty úılerdiń sany 20 paıyzdan aspaýy kerek. Bul qala qurylysyna qatysty halyqaralyq praktıkadan kelip otyr», - dedi Almashan Ahmedjanov.
