Almatynyń óndiris parkterine 760 mln teńge ınvestıtsııa tartyldy
Almaty ákimdiginiń málimetinshe, alǵashqy óndiristik parkter Naýryzbaı jáne Túrksib aýdandarynda jumysyn bastady, olar – «Brot Master», «Ala Estate» jáne «Samruk Group». Onda jalpy alańy shamamen 12 myń sharshy metrdi quraıtyn óndiris oryndary bar. Munda qurylys materıaldaryn, jıhaz, azyq-túlik, sýsyn, qýyrylǵan kofe, galantereıa buıymdaryn shyǵaratyn tsehtar jumys isteıdi. Jobalardy júzege asyrýǵa shamamen 760 mln teńge ınvestıtsııa tartyldy. Sonymen qatar 340-tan astam jumys orny quryldy.
Sonymen qatar, Almatynyń ındýstrıaldy aımaǵynda óndiristik parkterdi qurý úshin tórt kásiporynǵa jer ýchaskesi bólindi. Olar - «KazStroyTrade» JShS, «D&J Investments & Logistic,» «ADS Industries», «Ala Estate» jáne «Asia Prom Textile».
Qazirgi kezde kompanııalar qurylys-montaj jumystaryn júrgizýde. Alǵashqy óndiris nysandardyn 2021 jyldyń qańtar-aqpan aılarynda iske qosý josparlanyp otyr. Óndiris oryndarynyń jalpy alańy 37,5 myń sharshy metrdi quraıdy.
«Búgingi kúni óndiris parkteriniń ınvestorlary aldyn ala 19 kásiporynmen jalǵa alýdyń kelisimshartyn jasady. Munda jańa óndiristerdiń tutas keshenin qurý josparlanýda: ıaǵnı elektr jabdyqtary, kún sáýlesinen qorǵaıtyn júıe, gıdroızolıatsııalyq materıaldar shyǵarylady, kıim, shulyq pen ish kıim tigiletin bolady,– dep habarlady ákimdik ókilderi.
Aıta keteıik, Almatyda bıyl ınvestorlar men ónidiris parkteriniń rezıdenttteri úshin biregeı tetik ázirlendi. Qalada arnaıy komıssııa qurylyp, onyń quramyna farmatsevtıka, qurylys, jıhaz, jeńil jáne tamaq ónerkásibi salalarynyń 6 qaýymdastyǵynyń jáne kásipkerler forýmynyń músheleri endi.
Bekitilgen normalarǵa sáıkes múddeli tulǵalar qajetti qujattar paketin jınaqtap, Almatynyń ındýstrıaldy aımaǵyna júgine alady. Tekserýden soń joba komıssııanyń qaraýyna jiberiledi, eger maquldansa, oǵan óndiristik park mártebesi beriledi.
Eske salsaq, óndiristik parkter jobasy «Almaty Business-2025» baǵdarlamasy aıasynda júzege asyrylýda. Óndiristik oryndar ShOB sýbektilerine jeńildetilgen jaǵdaıda usynylady: jaldaý aqysy bir sharshy metrge 1000 teńgeden 1200 teńgege deıin. Bulardan ózge, jalǵa alýshylarǵa jyldyq 2%-ben 7 jylǵa deıin jeńildetilgen nesıe berilýi múmkin. Sonymen qatar, jobalardy júrgizý úshin konsaltıngtik kómek kórsetiledi: bıznes-jospar qurýdan bastap iske qosýǵa, sondaı-aq naryqta ónimdi ári qaraı jyljytýǵa deıin.
