Almatynyń «Olja» bazaryndaǵy órttiń kúshtiliginen tóbe men qabyrǵa qulaǵan
ALMATY. QazAqparat - Almatydaǵy baraholka jaıma bazaryndaǵy órt týraly habar bizge tym kesh kelip tústi. Bul týraly búgin Almatyda ótken brıfıngide Almaty qalalyq TJD Órt qaýipsizdigi salasyndaǵy baqylaý jáne aldyn alý qyzmeti basqarmasy bastyǵynyń mindetin atqarýshy Aıdos Seısebekuly Núsipbaev málimdedi.
«Almatynyń baraholka jaıma bazaryndaǵy «Olja» bazaryna irgeles ornalasqan «Almaly» bazaryndaǵy órt týraly habar Almaty qalalyq «101» kezekshi bólimine tym kesh kelip tústi. Alǵashqy órt sóndirýshiler toby órt týraly habar kelip túsken soń, 7 mınýttan keıin, ıaǵnı 16 saǵat 33 mınýtta kelip jetti. Bul ýaqytta órt ashyq sıpatta janyp jatqan edi. Órttiń aýmaǵy - 1 000 sharshy metrden asyp ketken bolatyn. Onyń ústine jumys kúni bolǵandyqtan, oqıǵa ornyna der kezinde kelip jetý qıyn boldy. Bazardyń aınalasynda mashınalar tym kóp boldy. Al satýshylar japa-tarmaǵaı jantalasyp, taýarlaryn, qoraptaryn júretin joldarǵa úıip jatty. Ókinishke qaraı, bazar aýmaǵyndaǵy órt sóndirý gıdranttaryndaǵy sý qysymy da álsiz boldy. Órttiń kúshti bolǵandyǵy sonshalyq, beton qabyrǵalary bıik qoımalardyń tóbesiniń qulap ketý qaýpi týyndady. Taýar tıelgen konteınerlerdiń tyǵyz ornalasýy da órtti sóndirýge kedergi keltirdi. Órttiń aýmaǵy - 3 000 sharshy metrdi qurady. Osy sebepten tilsiz jaýdy joıýǵa eki tikushaq tartyldy. Olar órt oshaǵyna barlyǵy - 35 ret sý septi. Bul 100 tonnadan astam sý. Órtti sóndirýge jeke quramnan 360-tan astam qyzmetker, 50-den astam tehnıka jáne eki tikushaq jumyldyryldy. Órt 18 saǵat 43 mınýtta aýyzdyqtalyp, 21 saǵat 55 mınýtta tolyǵymen sóndirildi. Qazir órttiń shyǵý sebepteri anyqtalyp jatyr. Oqıǵa ornynda órt sóndirý zerthanasy jumys isteýde. Keltirilgen zalaldyń kólemi ázirge belgisiz»,- dedi A. Núsipbaev.
