Almatynyń Olımpıada-2022 ótkizýge úmitker bolýy Lozannada sheshiledi
ASTANA. QazAqparat - Shveıtsarııalyq Lozannada Halyqaralyq Olımpıada komıteti atqarý komıtetiniń otyrysy bastalady.
Atqarý komıteti kún tártibiniń basty tarmaǵy - 2022 jylǵy qysqy Olımpıada oıyndaryn ótkizetin úmitker qalalardy jarııalaý bolmaq, dep habarlady ITAR-TASS.
Bul rásim HOK shtab-páterinde otyrystyń alǵashqy kúni, dúısenbide telekonferentsııa rejıminde ótedi. Komıtet músheleri úsh kún boıy jumys jasaıdy, onyń sońynda HOK-tiń kommýnıkatsııalar jónindegi dırektory Mark Adamstyń qatysýymen baspasóz brıfıngi bolady. Kún tártibinde sondaı-aq 2016 jylǵy Rıo-de-Janeıroda ótetin jazǵy Olımpıadalyq oıyndarǵa jáne 2018 jyly koreıalyq Phenchhanda ótpekshi qysqy Olımpıadalyq oıyndarǵa, sondaı-aq álemdik sporttaǵy taıaýdaǵy iri oqıǵa 16 tamyzda bastalatyn qytaılyq Nankın qalasynda ótetin jasóspirimder Olımpıadalyq oıyndaryna ázirlik barysy talqylanady.
2022 jylǵy Olımpıadalyq oıyndarǵa ótinim berý merzimi ótken jylǵy qarashada aıaqtaldy. Onda alty qala resmı úmitker atanǵan bolatyn. Alaıda ártúrli sebeptermen bul dodaǵa qatysýdan úsh eýropalyq qala - Krakov (Polsha), Shvetsııa astanasy - Stokgolm jáne ýkraındyq Lvov bas tartty. Sóıtip, endi úsh úmitker - qytaılyq Beıjiń, norvegııalyq Oslo jáne Qazaqstannyń ońtústik astanasy - Almaty ǵana qaldy.
2022 jylǵy Oıyndar ótkizýge úmitker qalalar boıynsha ınspektsııalyq saparlar kelesi jyldyń basynda bastalady. Kelesi jylǵy jazdyń basyna qaraı baǵalaý komıssııasy árbir úmitker boıynsha baıandama ázirleýi tıis.
Olımpıada astanasy 2015 jylǵy 31 shildede Kýala-Lýmpýrde (Malaızııa) ótetin HOK-tyń kezekti sessııasynda jarııalanady.
