Almatynyń «Nurshashqan» shaǵynaýdanynda aýyzsý máselesi sheshildi
ALMATY. QazAqparat – «Nurshashqan» shaǵynaýdanynyń turǵyndary qalalyq sý jáne káriz jelilerine bıylǵy jyldyń maýsym aıynda qosylady, dep habarlaıdy QazAqparat tilshisi.
Túrksib aýdanynyń aýmaǵynda ornalasqan burynǵy Kolhozshy aýylyndaǵy sý qubyry osydan 40 jyl buryn salynǵan. Osy ýaqyt ishinde qubyrlar isten shyǵyp, jergilikti halyq aýyzsýsyz qalǵan.
Qalanyń energetıkalyq tıimdiligi jáne ınfraqurylymdy damytý basqarmasynyń tapsyrysymen salynyp jatqan jańa sý burý jelileri 6867 adamdy úzdiksiz taza sýmen qamtamasyz etedi. Mundaı jumys bul aýdanda birinshi ret júrgizilip otyr.
Qurylys jumystary 25 maýsymda aıaqtalady. Al, kóshelerdegi jol tósenishteri men trotýarlardy merdiger kompanııa qurylys bitken soń qaıta qalpyna keltiredi.
