Almatynyń negizgi kapıtalyna tartylǵan ınvestıtsııa 608 mlrd teńgege jetti

ALMATY. QazAqparat – Almaty qalasynyń ákimi Baqytjan Saǵyntaevtyń tóraǵalyǵymen ótken apparat keńesinde 2020 jyly paıdalanýǵa beriletin ınvestıtsııalyq jobalardy iske asyrý qarqyny qaraldy, dep habarlaıdy QazAqparat tilshisi.

Bıylǵy 9 aıda megapolıstiń negizgi kapıtalyna salynǵan ınvestıtsııa kólemi 608,2 mlrd teńgeni qurady, fızıkalyq kólem ındeksi - 112,6%. Ótken jyldyń osy kezeńinde tartylǵan ınvestıtsııa kólemi 534,6 mlrd teńge bolatyn.

Jyl basynan beri 179 mlrd teńgeniń 34 jobasy iske asty. Onyń ishinde 130,7 mlrd teńgege 19 jastar turǵyn úı jáne óńdeý ónerkásibinde 32,6 mlrd teńgeniń 7 jobasy bar. Sonymen qatar, avtokólikter shyǵaratyn «Hyundai Trans Kazakhstan» zaýyty, qaǵaz ónimderin óndiretin «Papirone», maı ónimderin shyǵaratyn «Maslodel», avtomatty qaqpalar jasaıtyn «DoorHan», «Brotmaster», «Samruk Group», «Ala Estate» óndiristik parkteri quryldy.

Áleýmettik mańyzy bar 3 nysan paıdalanýǵa berildi. Atap aıtsaq, TAMOS & Prestige mektebi, Sh.Ýálıhanov atyndaǵy halyqaralyq mektep, SEN kópsalaly mýzyka ortalyǵy. Sondaı-aq, saýda jáne halyqqa qyzmet kórsetý salasynda 5 nysan salyndy.

Jyl sońyna deıin jalpy quny 454,3 mlrd teńgeni quraıtyn 82 ınvestıtsııalyq jobany iske asyrý josparda tur. Sonymen qatar, jeltoqsannyń sońyna deıin saýda jáne qyzmet kórsetý salasynda 82 joba júzege asady. Birqatar áleýmettik mańyzy bar nysandar paıdalanýǵa beriledi.

Jalpy, 2020 jyldyń qorytyndysy boıynsha megapolıstiń negizgi kapıtalyna salynǵan ınvestıtsııalar kólemi 900 mlrd teńge deńgeıinde, fızıkalyq kóleminiń ındeksi – 107% dep boljanýda.

Almaty ákimi Baqytjan Saǵyntaev josparlanǵan ındıkatorlardy oryndaý úshin ınvestıtsııalyq jobalardyń iske asyrý barysyn turaqty baqylaýda ustaýdy tapsyrdy.