Almatynyń Naýryzbaı aýdanyndaǵy Qaraǵaıly ózeninde sý deńgeıiniń kóterilý qaýpi joıyldy (FOTO)
ALMATY. QazAqparat- Búgin tańerteń Almaty qalasynyń Naýryzbaı aýdany arqyly aǵatyn Qaraǵaıly ózeninde tańerteń 08 saǵat 10 mınýtta muz keptelisi oryn aldy, dep habarlady Almaty qalasynyń Tótenshe jaǵdaılar departamentiniń resmı ókili Sandýǵash Baımuhanbetova.
Onyń aıtýynsha ylǵal qar Qaraǵaıly ózeniniń arnasyn kópir salynǵan tustan bekitip tastaǵan.
«Sonyń saldarynan Qalqaman yqshamaýdanyndaǵy D. Ahanov kóshesi boıynda ornalasqan № 77-shi jeke turǵyn úıdiń aýlasyn jartylaı sý basty. Qazir ózen arnasyn tazalaý jumystary júrip jatyr. Bul iske «Almaty qalasynyń qutqarý qyzmeti» mekemesiniń jeke quramynan 9 adam men 5 arnaıy tehnıka, QR ІІM Tótenshe jaǵdaılar komıtetiniń «Respýblıkalyq jedel-qutqarý otrıady» mekemesi jeke quramynan 6 adam jáne 1 arnaıy tehnıka jáne Almaty q. Tótenshe jaǵdaılar departamentiniń 3 qyzmetkeri jumyldyrylǵan», - dedi S. Baımuhanbetova.
Aıta ketelik, oqıǵa ornyna Naýryzbaı aýdanynyń kommýnaldyq sharýashylǵy bóliminiń ókilderi de kelip jetken. Ázirge ózen arnasynan 30 tekshe metr qar shyǵaryldy. Kópir astyndaǵy muz keptelisi joıyldy. Sáıkesinshe, ózende sý deńgeıiniń kóterilý qaýpi seıildi. Qazir ózen arnasyn tazalaý jumystary odan ári jalǵasýda.
