Almatynyń Naýryzbaı aýdanynda jyl sońyna deıin 26 balalar alańqaıy paıdalanýǵa beriledi
ALMATY. QazAqparat - Almaty qalasynyń Naýryzbaı aýdanyndaǵy «Rahat» shaǵyn aýdanynda «Jańa Alataý» qoǵamdyq qorynyń qaıyrymdylyq qarajatyna balalar alańqaıy jasalyp, paıdalanýǵa berildi.
Almaty qalasy tabıǵı resýrstar jáne tabıǵatty paıdalanýdy retteý basqarmasynyń habarlaýynsha, bul bıyl Naýryzbaı aýdanynda ashylǵan tórtinshi balalar alańqaıy. Jyl sońyna deıin taǵy da 22 balalar sport alańyn paıdalanýǵa berý josparlanǵan.
Osylaısha, qazirgi tańda ońtústik astanada «Almaty-2020» baǵdarlamasynyń «Áleýmettik baǵdarlanǵan qala» baǵytyna sáıkes, ishki aýlalyq aýmaqtardy damytý jumystary qarqyndy túrde júrgizilip jatyr.
«Qalanyń sportttyq ınfraqurylymyn salý - 2020 jylǵa qaraı, sportpen turaqty túrde aınalysatyn qala turǵyndarynyń úles salmaǵyn 30 paıyzǵa jetkizýge múmkindik beredi», - delingen habarlamada.
Aıta ketelik, qoldanysqa berilgen jańa alańqaıda 288 sharshy metrlik mını-fýtbol alańy, kóshe trenajeri, balalar átkenshekteri, jaraqat alýdan qorǵaıtyn 140 sharshy metrlik rezeńke tósenish, sondaı-aq, qoqys tastaıtyn jáshikteri bar oryndyqtar ornalasqan.
Abattandyrylǵan nysannyń jalpy aýmaǵy - 1000 sharshy metr.
Jobanyń quny - 12 mln teńge.
Aıta ketelik, osy aptanyń sońyna qaraı, Naýryzbaı aýdanynda taǵy 2 alańqaıdyń qurylysy aıaqtalady.
