Almatynyń Naýryzbaı aýdanynda jańa oqý jylynda eki mektep ashylady
ALMATY. QazAqparat - Mekteptegi oryn tapshylyǵyn azaıtý úshin 1 qyrkúıekke qaraı aýdanda 2400 oryndyq 2 mektep ashylady. Bul - Qalqaman shaǵyn aýdanynda 1800 balaǵa arnalǵan №206 mektep pen Qarǵaly shaǵyn aýdanyndaǵy 600 oryndyq «Zaman» jekemenshik mektebi. Bul týraly qala basshysy aýdan turǵyndarymen kezdesýde aıtty, dep habarlaıdy QazAqparat tilshisi.
Erbolat Dosaevtyń aıtýynsha, jyl sońyna deıin taǵy 2 mekteptiń qurylysy aıaqtalady. Bul - «Alma sıtı-5» turyn úı kesheni aýmaǵyndaǵy 1200 oryndyq jáne «Qalqaman» shaǵyn aýdanyndaǵy Abaı dańǵylynda ornalasqan 1500 oryndyq mektep.
Buǵan qosa, Shuǵyla shaǵyn aýdany aýmaǵyndaǵy «Álem sıtı» TK, «Alma sıtı-4» TK turǵyn úıdi salýshylar 1200 oryndyq 2 mekteptiń qurylysyn qolǵa alǵan. Bul 2023 jyldyń 3-toqsanynda aıaqtalady.
«Quramys» shaǵyn aýdanynda 1200 oryndyq jáne «Shuǵyla» shaǵyn aýdanynda 1600 oryndyq mekteptiń qurylysy kelesi jylǵa josparlanyp otyr. «Shuǵyla» shaǵyn aýdandaǵy №174 mektepke japsarlas 375 oryndyq qurylys júrgizýdiń JSQ ázirlenýde. Bul keler jyldyń 2-shi toqsanynda bastalady. Mektepke deıingi oryn tapshylyǵyn azaıtý úshin bıyl «Shuǵyla» shaǵyn aýdanynda 320 oryndyq balabaqshanyń qurylysy bastaldy. Aıaqtalý merzimi – 2023 jylǵy 2-toqsan»,-deıdi qala ákimi.
«Nurly Dala» turǵyn úı keshenide 320 oryndyq balabaqshanyń jobalyq-smetalyq qujattama ázirlendi. Jaqynda 800 oryndyq 3 balabaqshanyń JSQ daıyndaýǵa baıqaý jarııalanady. Qurylys 2023 jyly bastalady.
