Almatynyń Naýryzbaı aýdanynda jańa meshit ashyldy (FOTO)
ALMATY. QazAqparat- Almaty qalasyna jańadan qosylǵan Naýryzbaı aýdanynyń Qaraǵaıly eldi-mekeninde jańa meshit ashyldy. Bul týraly búgin Qazaqstan musylmandary dinı basqarmasynyń baspasóz qyzmetinen habarlady.
Meshittiń ashylý saltanatyna QMDB tóraǵasy, Bas múftı Erjan qajy Malǵajyuly, naıb múftı Serikbaı qajy Oraz jáne Naýryzbaı aýdanynyń ákimi Qýanyshbek Qalıuly jáne Almaty qalasynyń bas ımamy Nurbek Esmaǵanbet qatysty.
QMDB naıb múftıi Serikbaı qajy Oraz jańa ashylǵan meshitte alǵash ret Quran aıattaryn oqyp, ata-baba rýhyna duǵa baǵyshtady.
Al QMDB tórǵasy, Bas múftı Erjan qajy Malǵajyuly aýyl turǵyndaryn Alla úıiniń ashylýymen quttyqtady.
«Meshit - birlik pen izgiliktiń, ımandylyq pen baýyrmashyldyqtyń rýhanı qaınar kózi. Meshit - kez kelgen adamdy tiline, násiline, ultyna qarap bólmeı, bastaryn bir jerge toǵystyratyn rýhanı ortalyq. Ózge elden kelgen saıasatker de, elshiler de, túrli ult pen ulys ókilderi de osy meshitke at basyn tireıtin. Keıde bul meshit - eki adam arasynda týǵan daýǵa tórelik jasaıtyn, muqtaj jandarǵa járdem beriletin kómek úıine de aınalyp ketedi. Halyqqa nasıhat, ýaǵyz aıtatyn rýhanı ortalyq ta osy Allanyń úıi», - dedi óz sózinde Bas múftı Erjan qajy Malǵajyuly.
Sonymen qatar, Bas múftı jańa meshittiń bas ımamy bolyp taǵaıyndalǵan Kenjebaı Ádilbekulyna qasıetti Quran Kárimdi syıǵa tartý etip, aldaǵy qyzmetine tabystar tiledi.
Jańa meshittiń boı kóterýine demeýshilik jasaǵan Rahat Ýdanuly kelgen qonaqtarǵa óz rızashylyǵyn bildirdi.
