Almatynyń Naýryzbaı aýdanynda demalys kúnderi sýyq sý bolmaıdy
«Almaty sý» kásipornynyń málimetinshe, 10 jáne 11 maýsymda Naýryzbaı aýdanynyń Qarǵaly, Quramys, Qaraǵaıly, Taýsamaly, Aqjar, Tastybulaq, Taýjoly, Qalqaman-2 (ońtústik bóligi) shaǵynaýdandaryna sý berý ýaqytsha toqtatylady.
«Aýa temperatýrasynyń joǵarylaýyna baılanysty taýdaǵy qar jamylǵysynyń qarqyndy erý protsesi bastaldy, bul ózenderdegi aǵyndy sýlardyń kóbeıýine jáne sýdyń lastanýyna ákeldi. Aqsaı jáne Qarǵaly ózenderindegi bastapqy sýdyń laılanýynyń artýyna baılanysty súzgi stantsııalarynan sý alý ýaqytsha toqtatyldy», - dep habarlady «Almaty sý» kásiporny.
Sondaı-aq kásiporyn sý berýdegi shekteýler kezinde sýmen jabdyqtaý avtotsısternalarmen qamtamasyz etiletinin habarlady.
Eske salsaq, Naýryzbaı aýdanynda sondaı-aq ýaqytsha ystyq sý bolmaıtynyn habarlaǵanbyz.