Almatynyń Naýryzbaı aýdanynda agroónerkásip kesheni salynady
Almaty. QazAqparat-Naýryzbaı aýdanynyń ákimi Saıran Saıfedenov ınvestıtsııalyq forým barysynda qaıta biriktirilgen aýdannyń ekonomıkalyq áleýeti jóninde aıtyp berdi.
Naýryzbaı aýdany 2014 jyly qurylǵan, onyń 6967 gektar jeri bar. Aýdanda aýyl sharýashylyǵy salasyn damytýǵa baǵyttalǵan 700 jer telimi bar. «Aýdan aımaǵynda paıdalanýǵa jaramdy bos jatqan jerler de jeterlik. Biz olardyń arasynan 175 gektardy quraıtyn 28 ýchaskeni tańdap aldyq. Onda kommertsııalyq nysandar, kóppáterli turǵyn úıler, óndiris bazalary men ózge de áleýmettik nysandardy salýǵa bolady»,-dedi ol.
Al, aýdannyń ınfraqurylymyna qatysty sóz qoǵaı kele Saıfedenov búgingi tańda 1200 oryndyq mektep pen «Aqjar» móltek aýdanynda 1 aýysymda 500 adam qabyldaı alatyn emhana salynyp jatqandyǵyn aıtty.
Buǵan qosa, 2014-2016 jyldar aralyǵynda munda uzyndyǵy 50 km bolatyn 70 kóshe jóndelgen. Sonda-aq sý aǵatyn júıeler men uzaqtyǵy 20 km bolatyn 8 magıstraldy kósheler jaryqtandyrý jumystary júrip jatyr.
Naýryzbaı aýdany ákiminiń orynbasary Baǵlan Dandybaevtyń sózinshe, «Quramys» móltek aýdanynda akvapark salý josparda bar.
«Raıymbek dańǵylynyń boıynda kóptegen kóppáterli úıler boı kóteredi. Sondaı-aq agroónerkásip kesheni salynady. Qurylys merzimi týraly aıtýǵa áli erte. Ázirge oǵan ınvestorlardy tartý jumystary júrip jatyr»,-deıdi Dandybaev.
Sonymen qatar, aýdannyń negizgi kapıtalǵa degen ınvestıtsııa kólemi 6,5 mlrd teńgeni qurady. Bul ótken jylmen salystyrǵanda 3,5 esege kóp. 2016 jyly negizgi kapıtalǵa syrttan keletin ınvestıtsııalar 23,6 mln teńgeni qurady.
