Almatynyń «Muztaý» shaǵynaýdanynda jol salý jumysy mamyrda aıaqtalady

ALMATY. QazAqparat – «Muztaý» shaǵynaýdanynyń turǵyndary joldyń joqtyǵyna shaǵymdandy. Tolassyz jaýǵan jańbyrdan mashınalar batpaqqa batyp qaldy, dep habarlaıdy QazAqparat tilshisi.

Turǵyndar QazAqparat redaktsııasyna batpaqqa batyp qalǵan kólikterdiń sýreti men vıdeosyn jiberdi.

«Almaty sý» memlekettik kommýnaldyq kásipornynyń baspasóz qyzmeti málim etkendeı, qazir Medeý aýdanyna qarasty «Muztaý» yqshamaýdanyndaǵy (burynǵy Býtakovka) Zamartas kóshesiniń jol jabyny jedel qalpyna keltirilip jatyr.

«Jańbyr sýy shaıyp ketken joldar búgin tańerteń tegistelip, ınertti materıaldarmen nyǵaıtyldy. Qalanyń osy bóliginde sýmen jabdyqtaý jáne sý burý júıesiniń qurylysy, onyń ishinde Á. Beıseýov kóshesine asfalt tóseý jumystary byltyr tolyǵymen aıaqtaldy. Aıdarly jáne Zamartas kóshelerin abattandyrý jumystary karantındik shekteýler men qystyń bastalýyna baılanysty bıylǵa aýystyryldy. Bul kóshelerge asfaltbeton tóseý kún jylynǵanda qolǵa alynady. Ony osy jyldyń mamyr aıynda aıaqtaý josparlanyp otyr», - dep habarlady «Almaty sý» memlekettik kommýnaldyq kásiporny.

Aıta keteıik, kásiporyn tapsyrysy boıynsha «Muztaý» yqshamaýdanynyń turǵyndaryn ortalyqtandyrylǵan sýmen jabdyqtaý jáne sý burý júıesimen qamtamasyz etý jobasy 2020 jyly júzege asyryldy.

Buǵan deıin qalanyń bul sektorynda ınjenerlik jeliler bolmaǵan.