Almatynyń muz aıdyndarynda turǵyndarǵa táttiler tegin taratyldy
ASTANA. QazAqparat - Jańa jyl qarsańynda Almatynyń barlyq tegin muz aıdyndarynda qaıyrymdylyq sharasy ótti, dep habarlaıdy aqparattyq jáne sporttyq HAB.
Merekelik baǵdarlama aıasynda Aıaz-ata, aqshaqar jáne anımatorlar balalardy quttyqtap, elimizdiń beldi fabrıkalarynyń kondıterlik taýarlaryn tabystady. Qazaqstan kondıterlik assotsıatsııasy «Taqpaq aıtyp, bir dorba kámpıt utyp al» degen uranmen konkı teýip, sportpen shuǵyldanatyn qonaqtardy Jańa jylmen quttyqtady. Ár taqpaq aıtqan búldirshin tátti syılyqqa ıe boldy.
«Búgin Almaty qalasy ákimdiginiń qoldaýymen qaıyrymdylyq sharasyn ótkizýdemiz. Bul shara qalanyń barlyq tegin muz aıdyndarynda túngi on ekige deıin jalǵasady. Qala turǵyndaryn kele jatqan Jańa jylmen quttyqtap, elimizdiń kondıterlik fabrıkalaryna osyndaı múmkindik úshin alǵysymdy bildiremin. Biz sportpen shuǵyldanyp, salaýatty ómir saltyn ustanatyn azamattardy qoldap, syılyqtar tartý ettik. Osyndaı sharany muz aıdyndarynda ótkizgenimiz de sol sebepti. Bizdiń ónim Qazaqstanda ǵana emes, TMD elderinde de tanymal. Sondyqtan barlyǵyn ulttyq ónimdi qoldaýlaryńyzdy suraımyz», - dep bólisti Qazaqstan kondıterlik assotsıatsııasynyń vıtse-prezıdenti Marlen Abýlgazınov.
Bul shara balalardy kele jatqan Jańa jylmen quttyqtap, sportqa degen qyzyǵýshylyqty arttyrý maqsatynda uıymdastyryldy. Sonymen birge, Qazaqstan kondıterlik assotsıatsııasy syılyqtardy, kondıterlik taýarlardy Almaty qalasynyń balalar úılerine de taratyp beredi. Esterińizge sala ketsek, jeltoqsannyń birinen bastap osyndaı 8 tegin muz aıdyndary ashylǵan bolatyn.
